Petropavl qalasynyń 25 jastaǵy turǵyny Aleksandr Riabýha óziniń elektrondy málimetter bazasynda óli retinde tirkelgenin, osy sebepti turǵyn úi kezeginen alyp tastalǵanyn bilgen. Jas jigit alty aidan astam ýaqyt boiy memlekettik organdarǵa óziniń tiri ekenin dáleldei almai keledi, - dep habarlaidy Tengrinews.kz tilshisi "Astana"telearnasyna silteme jasap.
Jetimder úiinde ósken ol birneshe jyldan beri páter kezeginde tur. Jaqynda jigit óziniń tizimnen shyǵyp qalǵanyn bilgen.
"Naýryz aiyn qaraǵanda men ákimdiktiń baspana boiynsha kezeginde boldym. Biraq maǵan meni kezekten alyp tastaǵany týraly sms-habarlama keldi. Tizim jarty jylda bir ret jańartylady. Sol sebepti kúttim. Jaqynda ol jańartylypty, meniń tizimde joq ekenimdi dosym kórip, aitty. Iá, shynynda da joq ekenmin. Ákimdikke baryp bildim. Bul qatelik deidi. Kezekten alyp tastaý sebebinde meniń qaitys bolǵanym kórsetilipti. Ótken eki kún boiy ózimniń tiri ekenimdi jáne meni qaita kezekke qosýlary úshin qujattar jinadym", - deidi Aleksandr Riabýha.
Bárinen buryn, jigit "mezgilsiz óliminiń" saldarynan baspana kezeginen qaǵylyp, uzaq jyldar boiy jaldamaly páterlerdi kezýge májbúr bolamyn ba dep qorqady.
Petropavl ákimdigi ázirge onyń qalai bolǵanyn túsine almai, júieniń aqaýyn kinálap otyr.
"Respýblikalyq málimetter bazasynda júielik buzylý bolǵan. Saldarynan Aleksandrdyń statýsy kórinbeidi. Ol ótken aptada qalalyq ákimdikke keldi, oǵan ne isteý qajettigi aityldy. Erteń kóshi-qon politsiiasyna baryp, jańartamyz. Statýsy 5 kúnniń ishinde ózgerýi kerek. Tek sodan keiin ǵana ony baspana boiynsha kezekke burynǵy ornyna qaita qoiady. Máseleni baqylaýda ustap otyrmyz", - deidi Petropavl qalasy ákimdiginiń ishki saiasat bólimi basshysy Azat Ybyraev.
