Petropavlda intellektýaldy beinekameralardyń kómegimen jyl basynan 4 myńǵa jýyq jolda júrý erejesin buzý deregi anyqtaldy, dep habarlaidy "Ult aqparat".
Soltústik Qazaqstan oblysy politsiia departamenti baspasóz qyzmetiniń málimetinshe, Petropavl kóshelerinde beinebaqylaýdyń «Integra» jáne «Miraj» intellektýaldy júiesi jumys isteidi. Oblys ortalyǵyndaǵy 43 beinekamera jolda júrý erejesin buzý jaǵdailaryn avtomatty túrde tirkeidi. Abai-N.Nazarbaev, Internatsional-Jambyl, Internatsional-Astana kósheleriniń qiylysynda ornalasqan qondyrǵy baǵdarshamnyń ruqsat etilmegen túsine jáne toqtaý syzyǵynan ótkenderdi anyqtaidy. Al Jambyl-Partizan, Ǵ.Músirepov-Jambyl, N.Nazarbaev- Internatsional jáne M.Jumabaev-K.Sútishev kósheleriniń qiylysynda turǵan beinekameralar jyldamdyqty asyrǵandardy tirkeidi.
«Petropavlda sońǵy 3 aida intellektýaldy baqylaý júiesi qondyrǵylary arqyly 3627 jolda júrý erejesin buzý jaǵdaiy tirkeldi.
Qazirgi kezde júrgizýshiler eń jii jol beretin ereje buzýshylyq – ol toqtaý syzyǵynan ótip ketý. Beinebaqylaý júiesi arqyly kólik ielerine kóptegen aiyppul salyndy. Jalpy kóshe qiylysynan abailap ótken jón.
Asyǵystyqtyń sońy ókinishke ákelýi múmkin», - deidi SQO PD ákimshilik politsiia basqarmasynyń bastyǵy Bolat Jeksembinov.
Politseidiń aitýynsha, jyl basynan beinebaqylaýdyń kómegimen jyldamdyqty asyrǵan 59 júrgizýshi anyqtalyp, jazaǵa tartyldy. Qazir naǵyz qaýipti kezeń – aýa raiy qubylmaly, ári mektepterde tórtinshi toqsan dástúrli túrde bastaldy. Sondyqtan jolda júrý erejesin buzbai, ásirese qarbalas sátte abai bolǵan jón.
