Petropavlda politseiler 14 sáýirden «Túngi qaladaǵy balalar» jedel-profilaktikalyq is-sharasyn bastady. Nátijesinde oiyn-saýyq oryndarynda túnde júrgen 15 jasóspirim anyqtaldy, dep habarlaidy QazAqparat.
Soltústik Qazaqstan oblysy Politsiia departamenti baspasóz qyzmetiniń málimetinshe, operatsiia barysynda tártip saqshylary jastar kóp jinalatyn oryndardy, oiyn-saýyq mekemelerin, qala kóshelerin nazarǵa alady. Jasóspirimderge saǵat 23.00-den keiin zańdy ókilderiniń erip júrýinsiz turǵylyqty jerinen tys júrýge zańmen tyiym salynǵan. Alaida, adamdar zańnama talaptaryn bile bermeidi.
Máselen, Jambyl kóshesindegi dámhanalardyń birinde politseiler túngi ýaqytta ápkesi jáne tanystarymen birge bolǵan 17 jasar jasóspirimdi anyqtaǵan. Jastar quqyq buzýshylyq jasap jatqanyn bilgende, tańǵalysyn jasyrmady, olardyń aitýynsha, jasóspirim «eresekterdiń baqylaýynda bolǵan».
«Balalardyń zańdy ókilderi retinde tek ata-anasy nemese olardy almastyratyn tulǵalar bolýy múmkin. Bul jaǵdaida jasóspirimniń ata-anasyn jáne dámhana iesin jaýapqa tartýǵa týra keldi. Is-sharanyń eki kúninde jasóspirimderdiń saǵat 22.00-den keiin oiyn-saýyq oryndarynda jáne saǵat 23.00-den keiin turǵynjaidan tys júrýleriniń 15 faktisi anyqtaldy. Balalaryn tárbieleý jáne asyraý boiynsha mindetterin atqarmaǵany úshin 7 zańdy ókil jaýapqa tartyldy», - deidi Petropavl qalalyq politsiia basqarmasy bastyǵynyń birinshi orynbasary Álibek Ǵabdýllin.
Budan bólek, politseiler «Túngi qaladaǵy balalar» jedel-profilaktikalyq is-sharasy aiasynda turǵylyqty jeri boiynsha turmysy qolaisyz 56 otbasyny, eseptegi turǵan 40 jasóspirimdi tekserdi. Oqý oryndarynda politseiler oqýshylarmen 50-den astam kezdesý ótkizgen. Jasóspirimder quqyqtyq saýatsyzdyqtan, keibir áreketterine qatysty jaýapkershilik kózdelgenin túsinbegendikten, quqyq buzýshylyqqa jol berip jatady. Tártip saqshylary bul máselelerdi sheshý úshin qylmystyq áreketterden saqtaný joldary týraly keńester berdi.
