Petropavlda kóp qabatty turǵyn úide gaz ballonynyń jarylýyna bailanysty jergilikti aýqymdaǵy tehnogendik sipattaǵy tótenshe jaǵdai jariialandy, dep habarlaidy "Ult aqparat".
Petropavl qalasy ákimi Bolat Jumabekovtyń sheshimi ashyq normativti-quqyqtyq aktiler saitynda jariialandy.
Qujat Petropavldaǵy Internatsional kóshesi, 21 mekenjaiynda ornalasqan kópqabatty úide bolǵan jarylystan úsh apta ótkesin ǵana paida boldy. Túsindirme hatta qala ákiminiń sheshimi jarylys bolǵan kóppáterli turǵyn úi turǵyndarynyń qaýipsiz jáne jaily turý jaǵdailaryn qamtamasyz etý maqsatynda qabyldanǵany aitylǵan.
«Negizgi mindet – ǵimarattyń buzylǵan qurylymdaryn qalpyna keltirý, turǵyn bólmelerge kúrdeli jáne aǵymdaǵy jóndeý júrgizý, jylýmen jabdyqtaý, sýmen jabdyqtaý jáne elektrmen jabdyqtaý júielerin montajdaý jáne qaita jańartý. Nátijesinde, bul - Internatsional kóshesi, 21 turǵyn úidiń bólmeleri men turmystyq úi-jailarynyń jai-kúiin jaqsartady», - delingen qujatta.
Petropavl qalasy ákiminiń orynbasary Asqar Habibýlin tehnogendik sipattaǵy tótenshe jaǵdaidy joiý boiynsha jetekshi bolyp taǵaiyndaldy, oǵan tiisti is-sharalardy júrgizý tapsyrylǵan.
Esterińizge sala keteiik, oqiǵa 21 aqpan kúni saǵat 16.00 shamasynda boldy. 5 qabatty úidiń birinshi qabatynda ornalasqan dámhanada gaz ballony jarylyp, úsh adam qaza tapty. 120 adamdy qaýipsiz jerge shyǵarýǵa týra keldi.
SQO ákimi zardap shekkenderdiń eshqaisysy nazarsyz qalmaitynyn, baspananyń jóndeletinen aitty.
