Petropavl turǵyny áleýmettik jelide ult arazdyǵyn qozdyrǵany úshin 7 jylǵa sottaldy, dep habarlaidy QazAqparat.
Soltústik Qazaqstan oblysy politsiia departamenti baspasóz qyzmetiniń málimetinshe, áleýmettik jelige monitoring júrgizý barysynda ekstremizmge qarsy is-qimyl basqarmasy qyzmetkerleriniń nazaryn Petropavl turǵyny aýdarǵan. Onyń «Facebook»-ke ornalastyrǵan materialdarynan, qaldyrǵan jazbalarynan ult arazdyǵyn qozdyrý áreketi baiqalǵan.
Jedel-izdestirý sharasy nátijesinde oblys ortalyǵynyń 37 jastaǵy turǵyny anyqtaldy. Er adam «Facebook»-ten basqa «Instagram» men «VKontakte» áleýmettik jelilerinde de sol saryndas jazbalar qaldyryp kelgen. Filologiialyq saraptama ol ornalastyrǵan materialdardyń ekstremizm sipatyna ie ekendigin dáleldedi.
Petropavl qalalyq soty er adamdy kináli dep taýyp, 7 jylǵa bas bostandyǵynan aiyrdy. Sot úkimi zańdy kúshine endi.
«Biyl, osydan biraz ýaqyt buryn óńirdiń eki turǵyny sottaldy. Olardyń bireýiniń bostandyǵy 3,5 jylǵa, ekinshisiniki 4 jylǵa shekteldi. Sondyqtan, ult arazdyǵyn qozdyrǵandarǵa, ol meili áleýmettik jeli bolsyn, qatań jaza barlyǵyn eske salamyz. Zań boiynsha iri mólsherde aiyppuldan bastap, 7 jylǵa deiin bas bostandyǵynan aiyrý jazasy kózdelgen. Eger de onyń qylmystyq top quramynda áreket etkeni dáleldense nemese aýyr zardaptarǵa ákelse, jaza da aýyrlap, 20 jylǵa deiin bas bostandyǵynan aiyrylady», - deidi SQO PD ekstremizmge qarsy is-qimyl basqarmasynyń bastyǵy Rýslan Jarasbaev.
