Úndistan astanasy Niý-Deli biligi koronavirýstyń taralýyna bailanysty qatań shekteýlerdi taǵy bir aptaǵa iaǵni, osy jyldyń mamyr aiynyń 3-ne deiin uzartý týraly sheshim qabyldady.
Bul týraly "Ult aqparat" QR Indýstriia jáne infraqurylymdyq damý ministrliginiń Telegram kanalyna silteme jasap habarlaidy.
Lokdaýn Niý-Delige 19 sáýir kúni keshke engizilgen bolatyn. Jeke kompaniialardyń barlyq qyzmetkerleri tek úiden jumys isteý rejimine aýystyryldy. Tek memlekettik mekemeler men «negizgi qyzmet kórsetýshiler» ádettegidei jumysyn jalǵastyra beredi. Azyq-túlik dúkenderi men dárihanalar ashyq. Azyq-túlik ónimderin jáne qajetti taýarlardy úige jetkizýge de ruqsat etiledi.
26 sáýirden bastap Perý turǵyndary dúkenderge, bazarlarǵa, saýda ortalyqtaryna, dárihanalarǵa jáne basqa da adamdar kóp jinalatyn oryndarǵa barǵan kezde bir ýaqytta koronavirýstan qorǵaý úshin eki maskany qatar kiiýleri tiis. Sonymen qatar, kózdiń shyryshty qabyǵyn qorǵaý úshin arnaiy móldir ekrandy qoldaný da talap etiledi.
Italiia biligi koronavirýs mýtatsiiasyna bailanysty sońǵy eki aptasyn Úndistanda ótkizgenderdiń elge kirýin toqtatty. Bul týraly Densaýlyq saqtaý ministri Roberto Sperantsa habarlady.
«Italiiada turaqty turatyn adamdar mindetti túrde karantinde bolyp, Úndistannan shyqqan kezde jáne Italiiaǵa kirer kezde test tapsyryp, orala alady. Sońǵy 14 kúnde Úndistanda bolǵan jáne bizdiń elde júrgenderdiń bári aýrýdyń aldyn alý qyzmetterine habarlasyp, test tapsyrýlary kerek», - dedi Sperantsa.
Kosta-Rika biligi aýrýhanalarda COVID-19 juqtyrǵan patsientterge arnalǵan oryn tapshylyǵy qaýpine alańdaýly.
«Mundai naýqastarǵa bólingen tósek oryndardyń 94% reanimatsiia bólimshelerinde jumys isteidi», dep habarlady Densaýlyq saqtaý ministrligi.
Ortalyq Amerika Respýblikasynyń biligi infektsiianyń taralýyn boldyrmaý maqsatynda jergilikti ýaqyt boiynsha 21.00-den 05.00-ge deiin jeke kólikterdiń qozǵalysyna tyiym saldy.
