Senattyń jalpy otyrysynda «Qazaqstan Respýblikasynyń keibir zańnamalyq aktilerine Memleket basshysynyń 2020 jylǵy 1 qyrkúiektegi «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýynyń jekelegen erejelerin iske asyrý máselesi boiynsha ózgerister men tolyqtyrýlar engizý týraly» zań jobasy ekinshi oqylymda talqylandy. Qujatqa tolyqtyrýlar engizilgendikten, zań jobasy Májiliske qaitaryldy, dep habarlaidy "Ult aqparat".
Zań jobasy Memleket basshysynyń 2020 jylǵy 1 qyrkúiekte jariialanǵan «Jańa jaǵdaidaǵy Qazaqstan: ic-qimyl kezeńi» atty Qazaqstan halqyna Joldaýyn iske asyrý maqsatynda ázirlengen.
Qujatty ázirleýdiń negizgi maqsaty - memlekettik basqarý salasyndaǵy zańnamany odan ári jetildirý, kámeletke tolmaǵandarǵa qatysty seksýaldyq sipattaǵy qylmystar úshin jazany qatańdatý, kvazimemlekettik sektordaǵy sybailas jemqorlyqqa qarsy is-qimyl, suiytylǵan munai gazy naryǵynda básekelestikti damytý.
Zań jobasynda jaýapty hatshylardyń ókilettikterin ministrlikter apparattary basshylaryna júkteý; kámeletke tolmaǵandarǵa qatysty seksýaldyq sipattaǵy qylmystar úshin jazany qatańdatý; kvazimemlekettik sektor qyzmetkerlerinde qos azamattyq anyqtalǵan kezde jáne sybailas jemqorlyq qylmys jasaǵany úshin olarǵa qatysty eńbek shartyn buzý; monopoliiaǵa qarsy organmen kelisý boiynsha elektrondyq saýda alańy arqyly satylatyn gaz kólemin belgileý kózdelgen.
Zań jobasyn talqylaý barysynda Senat depýtattarynyń eskertýleri men usynystaryn eskere otyryp, Májilis maquldaǵan zań jobasyna tolyqtyrýlar engizý qajettigi týyndady. Máselen, QR Qylmystyq-protsestik kodeksine kámeletke tolmaǵandardyń jynystyq tiispeýshiligine qarsy asa aýyr qylmys boiynsha sotta isterdi qaraýdy alqabilerdiń qatysýynsyz sýdianyń jeke-dara júzege asyrýyn kózdeitin túzetýler engizý usynyldy.
«Qujatty ekinshi oqylymǵa daiyndaý kezinde zań jobasyna tolyqtyrýlar engizý qajet boldy. Memleket basshysynyń Joldaýynda kámeletke tolmaǵandarǵa qatysty jynystyq sipattaǵy qlymystar úshin jazany kúsheitý mindeti kórsetilgen. Túzetýler osy sanattaǵy isterdi kásibi sýdialardyń jalǵyz qaraýyn kózdeidi», - dedi depýtat Qanatbek Safinov.
Zań jobasy qaralǵannan keiin engizilgen túzetýleri bar qujat Májiliske jiberildi.
«Bul zań jobasynda birqatar mańyzdy ózgerister qarastyrylǵan. Memleket basshysynyń tapsyrmasy boiynsha elimizde balalardy qorǵaý salasynda naqty jáne júieli saiasat júrgizilip keledi. Osy shara aiasynda pedofilderdi qylmystyq jazalaý keshendi túrde kúsheitildi», – dedi Senat tóraǵasy Máýlen Áshimbaev.
