«Pedagog mártebesi týraly» Zańy jáne QR Bilim jáne ǵylym ministriniń tapsyrmasy aiasynda Bilim berý salasynda sapany qamtamasyz etý departamentteri pedagogterdiń quqyqtary men zańdy múddelerin buzǵan tulǵalarǵa qatysty tiisti sharalar qabyldap jatyr, dep habarlaidy "Ult aqparat" QR Bilim jáne ǵylym ministrliginiń baspasóz qyzmetine silteme jasap.
Laýazymdy tulǵalarǵa qatysty ákimshilik ister qozǵaldy. Atap aitqanda, Nur-Sultan qalasyndaǵy mektep-gimnaziiasy direktorynyń m.a. pedagogterden artyq esep berýdi talap etken. Sondai-aq, Túrkistan oblysynyń orta mektep direktory pedagogke óziniń qyzmetine jatpaityn fýnktsiialardy júktegen.
«Muǵalimderge qosymsha aqy men eńbek demalysynyń aqysy ýaqtyly tólenbegeni úshin Shyǵys Qazaqstan oblysynda mektep direktory jáne aýdandyq bilim bóliminiń meńgerýshisine tártiptik jaza qoldanyldy. Sondai-aq, mektep jóndeýge qarajat jinaý faktisi boiynsha Pavlodar qalasynyń mektep direktory jaýapqa tartyldy», - delingen QR Bilim jáne ǵylym ministrliginiń Feisbýktegi paraqshasynda.
QR Bilim jáne ǵylym ministrligi pedagogterdiń quqyqtary buzylǵan jaǵdaida aýmaqtyq departamentke habarlasqan jón ekendigin eske salady.
