«Aýyl» halyqtyq-demokratiialyq patriottyq partiiasynyń tóraǵasy Áli Bektaev pedagogtar ústemeaqysynyń ýaqytyly berilmeýi máselesin kóterdi, dep habarlaidy QazAqparat.
«Árine, problema kóp. Qarjy tapshy. Onyń barlyǵy jaqsy túsinemiz. Biraq, aitylmasa bolmaityn bir kúrdeli másele bar. 2019 jyldyń 1 maýsymynan 30 paiyzǵa kóbeigen bilim salasyndaǵy bastaýysh, negizgi jáne jalpy orta bilim berý uiymdarynyń muǵalimderi men pedagog-psihologtarynyń jalaqysy 2020 jylǵa tolyq qaralmaǵan. Tek Túrkistan oblysy boiynsha 12,8 mlrd teńge kóleminde qarjy jetpeidi. Osyndai jaǵdai basqa oblystarda da qalyptasqan. QR Eńbek jáne halyqty áleýmettik qorǵaý ministrliginiń bizge bergen málimetine súiensek, 2020-2022 jyldarǵa arnalǵan respýblikalyq biýdjetten osy maqsatqa ár jyly 350,3 mlrd teńge qarjy bólý týraly usynym jasalǵan. Ókinishke orai, 2019 jyldyń 27 tamyzynda ótken Respýblikalyq biýdjet komissiiasynyń qorytyndysy boiynsha, tek 317,3 mlrd teńge qarjy ǵana qoldaý taýyp, ár jylǵa óńirlerge bólinetin aǵymdaǵy maqsatty transfertterge 33 mlrd teńge az qaralǵan. Iaǵni, barlyq oblystar men qalalar boiynsha osynsha qarjy jetispeidi degen sóz», - dep atap ótti depýtat QR Parlamenti Senatynyń otyrysynda .
Onyń aitýynsha, QR Ulttyq ekonomika ministrliginiń jaýabynda Biýdjet kodeksiniń 45-babyna sáikes, jetispeitin qarajatty respýblikalyq biýdjetten maqsatty transfertter retinde bóldirý qajettigi aitylǵan.
«Al Qarjy ministrligi bolsa, jergilikti biýdjetke silteidi. Ókinishke qarai, Túrkistan oblysy ákimdiginen QR Parlamenti Senatynyń depýtaty Álimjan Qurtaevtan túsken usynystarǵa qaramai, bul másele 2020 jylǵy biýdjettiń naqtylanýy barysynda da eskerilmei qalǵandyǵy tań qaldyrady. Oblys ákimdigi Túrkistanda atqarylyp jatqan qyrýar jumys arasynan bólip júrip, 7,4 mlrd teńge qarjyny jergilikti biýdjet esebinen qarastyryp otyr. Sonda qalǵany – 5,4 mlrd teńge. Biraq, bul – on myńdaǵan muǵalimder men tárbieshilerdiń, psihologtardyń, sol saladaǵy eń aýyr jumysta júrgen azamattyq qyzmetshilerdiń jalaqysy. Olardyń ailyqtary onsyz da az. Endi kelip, memleket tarapynan kúnkóris deńgeiin kóterý maqsatynda qaralǵan ústemeaqyny da ýaqytynda ala almaityn túri bar. Týrasyn aitqanda, bul ústemeaqy ǵana emes, ózderiniń mańdai terimen tapqan eńbek tabysy», - dedi Á. Bektaev.
Bul rette depýtat 2020 jyldyń halyq úshin ońai bolmaǵanyn eske saldy. Panedmiia talai adamdy qiyndyqta qaldyrdy, jumyssyz qaldyrdy, tabysynan aiyrdy.
«Soǵan qosa, Qarjy ministrligi taǵy bir problemany qoldan jasap otyr. Dál jańa jyl aldynda jalaqysyn ala almaǵan halyqtyń kóńil-kúiin kóz aldyńyzǵa elestetip kórińizshi. Bizdiń jaýapty memlekettik organdar qashanǵy bir-birine siltep, arzymaityn nárseni oiynshyqqa ainaldyryp, halyqty sarsańǵa sala beredi? Respýblika boiynsha 33 mlrd teńge bizdiń memleket úshin asa kóp qarjy emes. Jyl sońyna deiin eki ai qalǵanyn eskersek, bul problemany tezirek sheshý kerek. Búgingi qaralyp otyrǵan 2020 jyldyń biýdjetin naqtylaý barysynda, QR Úkimetiniń rezervi 4 ese kóbeitilip, 316 mlrd teńgeni qurap otyr. Úkimet rezervinen osyndai qaryzdardy jappaǵanda, qandai nársege jumsaý kózdelip otyr? Biz aityp otyrǵan máseleni de Tótenshe jaǵdai dep qaraýǵa bolady. Qurmetti Eraly Luqpanuly! Erulan Kenjebekuly! Jańa jyl talai jańalyqtarǵa toly bolaiyn dep otyr. Aldymyzda bizdi tarihi oqiǵalar, saiasi naýqandar, Táýelsizdigimizdiń 30 jyldyǵy kútip tur. Olai bolsa, bizdiń Úkimetimiz halyq úshin ashyq jáne estitin Úkimet ekenin osy problemany sheshý arqyly dáleldeidi ǵoi dep oilaimyz», - dep sózin qorytyndylady Áli Bektaev.
