Parlament Májilisiniń jalpy otyrysynda «Pedagog mártebesi týraly» zań jobasy ekinshi oqylymda maquldandy, dep habarlaidy "Ult aqparat".
«Zań jobasy pedagog qyzmetiniń ózekti áleýmettik jáne kásibi máselelerin sheshýge, pedagogtarǵa júktemeni azaitýǵa, olardy kóptegen tekserýlerden, sondai-aq olarǵa tán emes fýnktsiialardan qorǵaýǵa, jumys istep júrgen pedagogtar úshin yntalandyrý sharalaryn belgileýge, jastardy mamandyqqa tartýǵa baǵyttalǵan», - dedi depýtat Ábdimanap Bekturǵanov.
Osy oraida ol depýtattyq korpýs engizgen basty túzetýlerge toqtaldy.
«2021 jylǵy 1 qyrkúiekten bastap orta bilim berý uiymdary pedagogtary úshin normativtik oqý júktemesin 18-den 16 saǵatqa tómendetý jónindegi norma bekitilip otyr. Bilim berý salasyndaǵy ókiletti organ aiqyndaityn bilim alýshylar men tárbielenýshiler arasynda halyqaralyq olimpiadalardyń, konkýrstar men sporttyq jarystardyń jeńimpazyn daiyndaǵan padagogqa tiisti memlekettik bilim berý uiymynyń qyzmeti boiynsha únemdeý esebinen úsh laýazymdyq ailyq aqy mólsherinde boljolǵy syiaqynyń tólenýin kózdeitin norma engiziledi», - dedi Á. Bekturǵanov.
Onyń sózine qaraǵanda, «Qazaqstannyń eńbek sińirgen ustazy» qurmetti ataǵymen marapattalǵan pedagogqa 1 000 eselengen ailyq eseptik kórsetkish mólsherinde (2019 jyly 2,5 million teńgege teń) bir jolǵy tólem belgilenedi.
Mádeniet jáne sport salasyndaǵy memlekettik bilim berý uiymdarynyń jáne áskeri oqý oryndarynyń muǵalimderine magistr dárejesi úshin 10 eselengen ailyq eseptik kórsetkish mólsherinde qosymsha aqy engiziledi.
«Aýyldyq jerlerde jumys isteitin pedagogtarǵa jeke turǵyn úi qurylysy úshin jer ýchaskelerin basym tártippen berýge kepildik belgilenedi», - dedi depýtat.
Sonymen qatar, jalpy otyrysta «Qazaqstan Respýblikasynyń keibir zańnamalyq aktilerine pedagog mártebesi, oqýshy men muǵalimge júktemeni tómendetý máseleleri boiynsha ózgerister men tolyqtyrýlar engizý týraly» zań jobasy da ekinshi oqylymda maquldandy. Qujat Parlament Senatynyń qaraýyna jiberiledi.
Zań jobasyn qaraý barysynda depýtattyq korpýs birqatar túzetýler engizdi.
«Mektep jáne kolledj pedagogtary toltyrýǵa mindetti qaǵazdardyń tizbesin ázirleý men bekitý jónindegi bilim berý salasyndaǵy ókiletti organnyń quzyreti belgilenedi. Joǵary oqý oryndarynyń pedagogtarynan basqa barlyq pedagogtarǵa áskeri qyzmetke shaqyrýdy keiinge qaldyrý jóninde norma qarastyryldy. Buryn keiinge qaldyrý tek aýyldyq jerde jumys isteitin pedagogtarǵa kózdelgen edi», - dedi Ábdimanap Bekturǵanov.
