Májilistegi Úkimet saǵatynda QR Qarjy ministri Erulan Jamaýbaev paidalanýdan shyǵarylǵan kólikterdiń ielerine qatysty salyq raqymshylyǵyn júrgizý usynylǵanyn aitty, dep habarlaidy QazAqparat.
Úkimet saǵatynda depýtat Juldyz Súleimenova kólik salyǵyna qatysty problemaǵa toqtaldy.
«Qarjy ministri óziniń baiandamasynda «E-Salyq-Azamat» qosymshasynyń basymdyqtary týraly atap ótti. Ministrlik aqparatyna sáikes, 2020 jyly «E-Salyq-Azamat» qosymshasy engizilgen sátten bastap 10 myńnan astam jeke tulǵa kólik salyǵyn túzetýge ótinim bergen. Ótinimderdiń negizgi deni salyqtyń durys emes somalaryn kórsetý, salyq salý nysandary joq adamdarǵa bereshekteri jóninde talap qoiý jáne basqa da suraqtardy qamtyǵan. Bul rette oryn alǵan aqaýlar, irkilister týraly suraǵanymyzda qos ministrlik derbes negizde eshqandai qatelik joq ekenin aitady. Mysaly, Ishki ister ministrligi óz tarapynan barlyq derekter ýaqytyly ári durys engizilgen dep kórsetedi. Al Qarjy ministrligi óz esepteýlerinde qatelikter joq ekenin alǵa tartýda. Osy eki vedomstvo bir-birine silteýi nátijesinde, kólik salyǵy problemasy áli de oryndy sheshilmei otyrǵanyn atap ótkimiz keledi. Sondyqtan «jiberilgen qatelikterdiń basty sebebi nede» degen suraqqa jaýap berýlerińizdi suraimyn», - dedi Májilis depýtaty.
Óz kezeginde ministr Erulan Jamaýbaev Ishki ister ministrligimen bul baǵytta tiisti jumystar júrgizilgenin atap ótti.
«Jalpy salyq tóleýshilerdiń qatysýynsyz 1 millionǵa jýyq aqparatty tolyǵymen ózektendirdik. Bul turǵyda kóp qatelikterge jol berilgen. «E-Salyq-Azamat» qosymshasynyń múmkindigimen qandai qosymsha problemalar bar ekenin bilip otyrmyz. Árine, bul jerdegi negizgi máselege toqtalsaq, azamattar kólikti bir-birine senimhat arqyly satyp jiberedi de, óz atynan shyǵarmaidy. Sonymen qatar, urlanǵan avtokólikter bar. Halyqtyń bir bóligi basqa memleketterge qonys aýdaryp, senimhatpen kóligin satyp ketedi. Osyndai problemalar bar jáne olardy moiyndaimyz. Sondyqtan Ishki ister ministrligimen tiisti jumystar júrgizilip jatyr. Budan bólek, qaitys bolǵan adamdarǵa qatysty másele bar. Ótken ǵasyrdyń 60-70-shi jyldary shyǵyrylǵan avtokólikter bar. Bul eski kólikter júrmeidi. Jol apatyna túskennen keiin, bólshektep satyp jibergen avtomashinalar kezdesedi. Osy oraida Úkimetke tiisti usynystardy berip otyrmyz, iaǵni atalǵan kólikterge qatysty raqymshylyq jasaǵan durys bolar. Óitkeni ol kólikterdiń naqty joq ekenin aitýǵa bolady. Sondyqtan Ishki ister ministrligimen birlese bul jumystardy atqaryp jatyrmyz», - dedi Jamaýbaev.
