Kerekýlik jas ónertapqysh Eldos Sábit múmkindigi shekteýli jandarǵa arnalǵan bionikalyq protez oilap tapty. Atalǵan jobanyń baǵasy naryqtaǵy úlgilerge qaraǵanda qoljetimdi.
Qazirgi tańda Eldos Pavlodar qalasyndaǵy Innovatsiialyq Eýraziia ýniversitetiniń stýdenti. Ol biraz ýaqyttan beri qol protezin jasaýdyń qyr-syryn zerttep, zamanaýi tehnologiialardyń kómegimen yńǵaily jáne tiimdi baǵadaǵy protez jasap shyqqan.
«Men jasaǵan protez kóp jaǵynan yńǵaily degen oidamyn. Bionikalyq qoldyń barlyq saýsaǵy qozǵalady. Qoldaǵy bulshyqetter jiyrylǵanda motordan baqylaýshyǵa signal keledi. Sonyń nátijesinde saýsaqtar jumylyp, ashyla alady. Bul men jasap shyqqan protezdiń qazirgi múmkindigi. Aldaǵy ýaqytta qol proteziniń qyzmetin tolyqtyryp, tabiǵi saýsaqtar sekildi birneshe fýnktsiialardy qosatyn bolamyn. Áli de bul jaǵynan jumystardy jalǵasyramyn. Bul joba sheteldik qymbat protezder siiaqty elektromiografiianyń kómegimen jumys isteidi. Protez plastikten jasalyp, 3D-printerden basyp shyǵarylady. Qurylǵyǵa servoprivod, plata, elektromiografiialyq tetik pen akkýmýliator qoldanylady», - deidi Eldos Sábit.
Eldos jańa týyndysyn aimaqtyq óndiriste iske qospaq niette. Qazirgi ýaqytta jobaǵa sheteldik investorlar qyzyǵýshylyq tanytyp úlgergen. Alaida ónertapqysh bul usynysty qabyldaýǵa asyqpai otyr. Sebebi, ol memleketten grant alyp, jobany iske asyrýdy josparlaýda.
«Ázirge jobaǵa Densaýlyq saqtaý ministrligi qyzyǵýshylyq tanytyp, balalar úshin protez jasaýymyzdy surady. Biz jasaýǵa bolady dep jaýap berdik. Balalarǵa bionikalyq protezben salystyrǵanda elektrondy protez yńǵaily», - deidi ol.
Qazirgi ýaqytta Eldos óz týyndysyn túrli kórmelerde tanystyryp júr. Jýyrda Pavlodarda ótken IT-forýmda atalǵan jobany QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev qajetti ári zamanaýi joba dep baǵalady.
Aita ketý kerek, mundai protez buǵan deiin de jasalǵan bolatyn. «Júz jańa esim» jeńimpazy atanǵan Máýlen Bekturǵanov elimizde alǵash ret bionikalyq protez oilap tapty.
