Pavlodarlyq órt sóndirýshiler órtenip jatqan páterden eki balany qutqardy, dep habarlaidy "Ult aqparat" Pavlodar oblystyq Tótenshe jaǵdailar departamentiniń baspasóz qyzmetine silteme jasap.
Baspasóz qyzmetiniń málimetterine qaraǵanda, Pavlodar oblysynyń ortalyǵyndaǵy Kataev kóshesiniń boiynda ornalasqan bes qabatty úiden órt shyqqany týraly habar TJD-iń biryńǵai dispetcherlik pýltine saǵat 12:23-te kelip tústi. Oqiǵa ornyna dereý «Órt sóndirý jáne avariialyq-qutqarý jumystary» MM-iń kúshteri attandyryldy.
«Órt ornyna aldymen jetken №4 órt sóndirý beketiniń qyzmetkerleri barlaý júrgizip, ekinshi qabattaǵy úsh bólmeli páterde eki balanyń bar ekenin anyqtady. Qaraýyl bastyǵy Aslanbek Tlenbaev órt sóndirýshilerge saty arqyly joǵaryǵa kóterilip, balalardy qutqarýdy tapsyrdy. Bólimshe komandirleri Sultan Jasqairatov men Nurbek Shapenov ekinshi qabatqa saty arqyly kóterilip, terezeden alty jáne bes jasar eki er balany alyp shyqty»,-delingen habarlamada.
Sondai-au onda balalardyń anasy kishkentai sábiimen dúkenge shyǵyp, balalardy úide jalǵyz qaldyryp ketkeni aitylǵan. Órt sóndirýshiler kelgenge deiin podezden 25 adam ózderi shyǵyp úlgergen.
Oqiǵa ornynda órt sóndirý qyzmetiniń bes tehnikasy men on bes qyzmetkeri jumys istedi. Órt saǵat 12:37-de aýyzdyqtalyp, 12:45-te tolyqtai sóndirildi. Anyqtalǵandai, órt balkonǵa joǵarǵy qabattaǵy páterlerdiń birinen ushyp túsken temeki tuqylynan paida bolǵan .
Pavlodar oblysynyń Tótenshe jaǵdai departamenti elimiz boiynsha órt qaýipsizdigi ailyǵy júrip jatqandyǵyn habarlaidy jáne óńir turǵyndaryna órt qaýipsizdigi erejelerin qatań saqtaý qajettigin eskertedi.
