Aqqýly aýdanynyń Sharbaqty aýylynda turatyn kópbalaly otbasynda ýly gazdy anyqtaityn qurylǵy ornatýdyń nátijesinde qaiǵyly jaǵdaiǵa tosqaýyl qoiyldy, dep habarlaidy "Ult aqparat" pavlodarnews.kz agenttigine silteme jasap.
Bes bala tárbielep otyrǵan jalǵyzbasty ana Bibigúl Seitimova keshki saǵat 21.30-22.00 shamasynda ádettegidei pesh jaǵyp, balalardy uiyqtatýǵa qamdanyp jatqan. Kenetten qabyrǵada ilýli turǵan qurylǵy dabyl qaǵyp, peshtiń jalynan tútin shyǵa bastaǵan. Dereý balalardy dalaǵa shyǵarǵan ana úidiń esik-terezesin jeldetýge kirisken.
«Qalaǵa barsam da, basqa jerge shyqsam da bes balamdy birdei alyp júre almaimyn, - deidi Bibigúl Seitimova. - Astanadaǵy bes qaiǵyly oqiǵadan keiin balalardy jalǵyz qaldyrýǵa da qorqatyn boldym. Ýly gazdyń aldyn alatyn qurylǵy ornatylǵannan keiin janym tynysh tapty. Úlken qyzyma qurylǵy dabyl qaqsa, tez arada dalaǵa shyǵyp, jaqynda ornalasqan meshitke baryńdar dep eskertip qoidym».
4 aqpan kúni aýdandyq tótenshe jaǵdailar bóliminiń basshysy Rinat Karkinbaev pen aýdandyq órt bóliminiń qyzmetkerleri Aqqýly, Sharbaqty jáne Jambyl aýyldaryndaǵy kópbalaly úilerdi aralap, qaiyrymdylyq aktsiiasy sheńberinde ýly gazdy anyqtaityn qurylǵy ornatyp bergen. Ajal aýzynan aman qalǵan ana aýdandyq tótenshe jaǵdailar bóliminiń basshylyǵyna alǵysyn bildirip, qaýipsizdik maqsatynda árbir úige osyndai qurylǵy qajet ekenin aitady.
Eske sala keteiik, biyl jergilikti biýdjet esebinen 840 myń teńgege az qamtamasyz etilgen 25 kópbalaly otbasynyń úilerine jóndeý jumystary júrgiziledi. Qazirgi tańda aýdanda 461 kóp balaly otbasy turady. Aita keterligi, Qazaqstan elektroliz zaýyty Pavlodar oblysynyń turǵyndary úshin 125 dana ýly gazdan qorǵaityn qurylǵy bólgen. Onyń 25-i Ekibastuz qalasy turǵyndarynyń úilerine, qalǵandary oblystyń jeti aýyldyq eldimekenderindegi úilerge ornatylady.
