Pavlodar qalasynda turatyn 14 jasar oqýshy 5 tilde sóileidi. Bul týraly Ravlodarnews.kz saity habarlady.
Qaladaǵy daryndy balalarǵa arnalǵan Abai atyndaǵy gimnaziianyń 8-synyp oqýshysy Zada Aiala qazaq, orys, aǵylshyn, nemis, qytai tilderinde sóilei alady.
Sonymen qatar ol fortepianoda jaqsy oinap, lingvistikalyq interferentsiianyń eki shet tilin úirenýdegi konstrýktivti jáne destrýktivti jaqtaryna arnalǵan ǵylymi joba jazyp júr. Daryndy qyzdyń til úirenýge degen qyzyǵýshylyǵy kishkentai kezinen bastap oianǵan.
«Qazir jastar kóp tildi bilýi kerek. Bilimdi bolsań ǵana maqsatyńa jetesiń, týǵan elińdi álemge tanyta alasyń. Anam aǵylshyn tili páninen stýdentterge sabaq beredi, ákem sport salasynda. Keide otbasymyzda anammen aǵylshyn tilinde de sóilesemiz. Qazir nemis tilinen olimpiadaǵa daiyndalyp júrmin. Álemde aǵylshyn, qytai tilderinde sóileýshilerdiń sany artýda. Sondyqtan osy tilderdi meńgerip ǵana qoimai ári zertteý kerek», - deidi Zada Aiala.
Talantty shákirt kóp tildi úirený qiyn degen pikirmen kelispeidi.
«Eger aldyńa maqsat qoisań ol maqsatyń jolynda barlyq kedergilerdi jeńe bilýiń kerek. Este saqtaý qabiletiń arttyrý úshin arnaiy jattyǵýlar jasaýǵa keńes beremin. Tildi úirenýdiń joly kóp. Ózim oqý ortalyqtaryna baryp ǵana qoimai, túrli tilderde film kórip, án tyńdaǵandy unatamyn. Internette til úirenýshilerge arnalǵan túrli onlain sabaqtar da bar. Qytai tili - qiyn tilderdiń biri. Sondyqtan qytai tilimdi qazirgi tańda tereńirek úirenip júrmin. Otbasymyzda ápkem Alýa da tórt tildi biledi», - deidi ol.
Daryndy shákirttiń ustazy Shamshyraq Qydyrbaevanyń aitýynsha, Aiala 7-synypta oqi júrip, 9-synyptyń atynan olimpiadaǵa qatysyp júldeli 3-orynǵa ie bolǵan.
«Otyz jyldan beri bilim salasynda jumys isteimin. Osy ýaqyt aralyǵynda qanshama myqty shákirtterdi daiyndap shyǵardyq. Aiala sekildi talantty shákirttermen jumys jasaý bala tárbieleýge jiger beredi. Onyń boiyndaǵy ómirge degen qushtarlyq, jańa nárseni uǵynýǵa talpyný ár balaǵa úlgi bolýy kerek», - deidi Shamshyraq Bekenovna.
