Pavlodar qalasynyń politsiiasyna Qudaiberdiev kóshesinde jigit úidiń tóbesinen sekirmek bolǵany týraly habarlama kelip tústi, dep habarlaidy Ravlodarnews.kz.
Oblystyq politsiia departamenti baspasóz qyzmetiniń málimeti boiynsha, oqiǵa ornyna dereý avtopatrýlder men jedel tergeý toby jiberildi.
- Patrýldik politsiia batalonynyń qyzmetkerleri Azamat Mustafin men Áset Tameshev jas jigittiń karnizdiń shetinde turǵanyn anyqtady. Tártip saqshylarynyń sózine qulaq aspaǵan. Inspektorlar kásibi túrde áreket etti, olar úshin eń bastysy jigitti oilanbai jasalǵan qadamnan kóndirý boldy, - dedi Pavlodar qalasy patrýldik politsiia batalonynyń komandiri Renat Sharipov.
Jigit politseilerdiń sózin tyńdamaǵan jáne qarsylyq tanytqan. Biraq uzaq kelissózderden keiin politseiler pavlodarlyqty qutqaryp qaldy.
Inspektorlarmen áńgimelesý barysynda ol óziniń jeke ómirindegi problemalarǵa bailanysty osyndai qadamǵa barǵanyn aitty.
- Biz onymen 20 minýt sóilestik, biraq sol sátte men úshin ár minýt sheksiz bolyp kórindi. Bul kóz aldyńyzda bolǵan kezde jaǵdaidy júregińizge jaqyn qabyldamaý múmkin emes. Men oǵan eshkimi joq jetim balalar týraly aita bastadym, al ol bolsa, otbasylyq janjalǵa bola ómirimen qosh aityspaq bolǵan. Óitkeni, ómirdegi eń basty bailyq - otbasy. Ol karnizdiń shetinen alystai bastady jáne ony bul áreketke ne itermelegeni týraly aitty. Keiin telefon surap, aǵasyna qońyraý shaldy. Ol ózi úshin durys qorytyndy shyǵaryp, barlyǵyn otbasymen birge sheshedi dep úmittenemin, - dedi Áset Tameshev.
Politsiia jigittiń ata-anasymen birge úiine ketkenin habarlady.
