Pavlodarda qalalyq qarjy bóliminiń burynǵy qyzmetkerine qatysty sot úkimi shyqty. Áiel sybailastarymen birge kezekte turǵandarǵa arnalǵan eki páter men jataqhanadaǵy bir bólmeni satyp, 18 million teńge tabysqa kenelgen, - dep habarlaidy Tengrinews.kz agenttigi.
Is materialdaryna sáikes, 36 jastaǵy áiel qarjy bóliminiń turǵyn úidi jaldaý jáne jekeshelendirý sektorynyń bas mamany qyzmetin atqara júrip, bos páterlerdi taýyp, jalǵan jekeshelendirý kelisimsharttaryn jasap, olardy resmi túrde memlekettik turǵyn úi qorynan páter alýǵa quqyǵy bar úmitkerlerge resimdegen.
Onyń sybailastary bolǵan eki zańger jalǵan azamattardy taýyp otyrǵan. Olar Semei poligonyndaǵy iadrolyq synaqtardan zardap shekken zeinetkerler men zardap shekkender arasynan bolǵan. Turýǵa arnalmǵan páterler alaiaqtyq jolmen jekeshelendirilip, jańa ielerine tirkelip, keiin naryq baǵasynan eki ese tómen baǵada satylyp otyrǵan.
Sotta eks-sheneýnik kýágerler men aiyptalýshylar ózine jala japqanyn aityp, óz kinásin moiyndamaǵan.
"Sottalýshy óz kinásin tolyq moiyndamaǵanyna qaramastan, sot onyń kinásin negizgi sot talqylaýy barysynda zerttelgen dáleldemelermen tolyq rastalǵan dep sanaidy", - delingen sot úkiminde.
Pavlodar qalasynyń №2 soty Pavlodar qalasy qarjy bóliminiń burynǵy qyzmetkerin bir top adammen aldyn ala aýyz jalasý arqyly memlekettik fýnktsiialardy oryndaýǵa ýákiletti bola tura óziniń qyzmettik babyn paidalana otyryp, asa iri mólsherde alaiaqtyq jasaǵany, jalǵan qujattardy jasaǵany úshin kináli dep tanylyp, 3 jylǵa bas bostandyǵynan aiyrý jazasy taǵaiyndalǵan.
Aita keteiik, úkim jariialanǵan soń birden eks sheneýnik qamaýǵa alyndy. Áiel jazasyn orta qaýipsizdiktegi qylmystyq-atqarý júiesiniń mekemesinde óteitin bolady.
Taǵy eki sottalýshy 3 jyl 6 aiǵa bas bostandyǵyn shekteý jazasyn aldy. Sot olardyń shyn júrekten ókinýin, kinásin moiyndaýyn, tergeýge kómektesýin jáne kishkentai balalarynyń bolǵanyn eskergen.
