Pavlodarda kópfýnktsionaldy Muz sport saraiyn salý jobasyna 19,9 mlrd teńge bólindi, dep habarlaidy ult.kz.
Joba Memleket basshysynyń Quryltaidyń birinshi sessiiasynda bergen óńirlerdegi áleýmettik infraqurylymdy damytý jónindegi tapsyrmalaryn oryndaý aiasynda júzege asyrylyp jatyr.
Jańa keshenniń jalpy aýdany 22 myń sharshy metrden asady. Munda Olimpiada talaptaryna sáikes keletin 400 metrlik konkimen júgirý joly, kanadalyq jáne eýropalyq formattaǵy eki hokkei alańy, sondai-aq kerling jolaqtary bolady.
Sonymen qatar keshende 500 kórermenge arnalǵan tribýna, jattyǵý zaly, jattyqtyrýshylar men tóreshilerge arnalǵan bólmeler qarastyrylady.
Nysandy 2027 jyldyń jeltoqsanynda paidalanýǵa berý josparlanyp otyr.
Qysqy sporttyń bes túri damidy
Muz saraiy iske qosylǵannan keiin munda qysqy sporttyń bes olimpiadalyq túrin damytý josparlanǵan. Olar:
- konkimen júgirý;
- shaibaly hokkei;
- mánerlep syrǵanaý;
- short-trek;
- kerling.
Keshende jańa sport sektsiialaryn ashyp, oqý-jattyǵý jiyndaryn ótkizýge jáne túrli deńgeidegi jarystar uiymdastyrýǵa múmkindik týady.
Qazir 370 myńnan astam turǵyny bar Pavlodarda 19 hokkei korty jumys isteidi. Onyń beseýi jabyq. Budan bólek, qalada muz saraiy men muz arenasy bar.
Alaida qoldanystaǵy sport nysandary turǵyndar men sport uiymdarynyń suranysyn tolyq qamtamasyz ete almai otyr. Jańa keshen olardyń júktemesin azaityp, turǵyndardyń qysqy sport túrlerimen ainalysýyna qosymsha múmkindik beredi.
