Qaiǵyly oqiǵa Ýspenka qalasynda boldy, dep habarlaidy QazAqparat.
«Maýsymnyń bir kúni tańerteń Pavlodar oblysy Ýspen aýdanynyń politsiiasyna aýyl turǵyny qońyraý shalǵan. Er adam qoryqqan daýyspen aýlasynda 28 jastaǵy áieldiń óltirilgeni týraly habarlaǵan», - dep málimdedi Pavlodar oblysynyń politsiia departamentiniń baspasóz qyzmeti.
Atalǵan is politsiia bólimi bastyǵynyń orynbarasy Asqar Aralbaev pen aǵa tergeýshi Maqsat Dúisembaevqa tapsyrylǵan.
Qaitys bolǵan áiel 61 jastaǵy Ýspenka aýylynyń turyǵynymen qarym-qatynasta bolyp, birge turǵan.
Er adam jii qol kótere bergennen keiin áiel onymen qarym-qatynasyn úzgen.
«Baratyn jeri bolmaǵan áiel tanysynyń úiinde turýǵa suranady. Biraz ýaqyttan keiin bul úige Pavlodardan qonaq keledi. Kelgen qonaq pen áieldiń arasynda sezim oianyp, Pavlodarǵa ekeýi birge qaitpaq bolǵan. Bul týraly estigen 61 jastaǵy áieldiń burynǵy ǵashyǵynyń boiyn qyzǵanysh bileidi», - dep qosty tártip saqshylary.
Er adam ishimdikke toiyp alyp, áieldi oiynan ainytpaq bolǵan. Alaida ol oiynan qaitpaitynyn aitady.
«Sol kezde er adam áieldiń kókirek qýysyna pyshaq suqqan. Ashýǵa býlyqqan er adam sol áreketin birneshe ret qaitalaǵan, - dedi politsiiadan. – Úi iesi bolǵan oqiǵaǵa kýá bolady. Ol qylmyskerdi ustaýǵa tyrysqan, alaida qolynan kelmegen».
Qylmysker belgisiz baǵytta izin sýytady. Úi iesi dereý jedel járdem shaqyryp, politsiiaǵa habarlasqan.
Oqiǵa ornyna jetken meditsina qyzmetkerleri áieldiń ólgenin anyqtady, al politseiler az ýaqyttyń ishinde kúdiktini ustady.
«Osy qylmysty jasaǵany úshin er adam QR Qylmystyq Kodeksiniń 99-babynyń 1-bólimine sáikes 12 jylǵa bas bostandyǵynan aiyryldy. Ol jazasyn qatań rejimdegi koloniiada óteidi», - dep málimdedi departamentten.
Ókim Ýspen aýdandyq sotynda qyrkúiekte shyqqan.
