Foto:elements.envato.com
Pavlodar oblysynda sot jeti adamnyń ólimine sebepshi bolǵan er adamǵa qatysty úkim shyǵardy, - dep habarlaidy Tengrinews.kz agenttigi.
Er adam eki jylǵa bas bostandyǵynan aiyryldy. Jappai ýlaný byltyr mamyrda Ertis aýylynda bolǵan. Sol kezde eki kúnniń ishinde birden jeti adam qaza boldy.
Aiyptalýshy tarapta - jergilikti turǵyn. Is materialdaryna sáikes, er adam bes tanysyna metil spirtin bergen.
"Metanoldy qoldaný saldarynan sottalýshy P.-nyń kinásinen abaisyzda jeti adam qaza tapty", - dedi Ertis aýdandyq soty ókilderi.
Sot málimetinshe, prokýror sottalýshyny eki jyl alty aiǵa bas bostandyǵynan aiyrýdy suraǵan. Sottalýshynyń ózi jáne onyń qorǵaýshysy bas bostandyǵynan aiyrýǵa bailanysty emes jaza taǵaiyndaýdy surady.
Pavlodar oblysynyń Ertis aýdandyq soty er adamdy QR QK-nyń 104-baby 2-bóligi boiynsha "Abaisyzda eki nemese odan da kóp adamdy qazaǵa ushyratý" boiynsha qylmystyq quqyq buzýshylyq jasaǵany úshin kináli dep taýyp, eki jylǵa bas bostandyǵynan aiyrý týraly úkim shyǵardy.
Eske salaiyq, 2022 jyldyń mamyrynda Ertis aýylynyń úsh turǵynynyń denesi úilerinen tabylyp, taǵy úsh adam aýdandyq aýrýhanada kóz jumdy. Keiin jetinshi jábirlenýshi pavlodarlyq aýrýhanada qaza bolǵan. Qaitys bolǵandardyń arasynda ákesi men balasy bar.
