Pavlodar oblysynda júk kóligi kópirdiń tiregin buzyp, qurylymnyń bir bóligi kóliktiń ústine qulady, dep habarlaidy "Ult aqparat".
«Oqiǵa ornyna kelgen politseiler saǵat 22:20-da 42 jastaǵy «Shacman» markaly kóliktiń júrgizýshisi Pavlodarǵa qarai tasjolmen kele jatyp, kólik qozǵalysynyń qaýipsizdigine kóz jetkizbei, kýzovymen kópirdiń tiregin soqqan. Oqiǵa saldarynan kópirdiń bir bóligi qirady», - dep habarlady Pavlodar oblystyq politsiia departamentiniń baspasóz qyzmeti.
Pavlodar-Qyzylorda tasjolynyń 42-shi shaqyrymynda bolǵan jol-kólik oqiǵasy týraly habar Aqsý qalalyq kezekshilik bólimine 23 tamyz kúni keshki saǵat 22:46-da túsken.
«Anyqtalǵandai, budan buryn júrgizýshi Shekarashy aýylynda salynyp jatqan kópir mańynda qum túsirgen. Keiin kólik quralynyń kýzovyn túsirmei, jolǵa shyǵyp ketken», - dedi departamenttiń baspasóz hatshysy Janna Belialova.
Apat saldarynan eshkim zardap shekken joq. Meditsinalyq qorytyndy boiynsha, júrgizýshi mas bolmaǵan.
«Atalǵan fakti boiyna júrgizýshiniń ústinen QR Ákimshilik quqyq buzýshylyq týraly kodekstiń 610-baby «Kólik júrgizýshileriniń jol júrisi qaǵidalaryn adamdardyń densaýlyǵyna ziian keltirýge, kólik quraldarynyń nemese ózge de múliktiń búlinýine alyp kelgen buzýshylyǵy» boiynsha ákimshilik óndiris qozǵaldy. Material sotqa jiberildi», - dep atap ótti politsiia.
