Pavlodar oblysynda buryn sybailas jemqorlyq qylmysyn jasaǵan eki mektep direktory jumystan shyǵaryldy. Bul týraly Sybailas jemqorlyqqa qarsy is-qimyl agenttiginiń Pavlodar oblysy boiynsha departamenti basshysynyń mindetin atqarýshy Ardaq Balǵojin málim etti, dep habarlaidy "Ult aqparat".
Ardaq Balǵojin ANTIKOR aqparat alańynda óńirdegi birneshe mekemege jemqorlyq táýekelderi boiynsha júrgizilgen taldaýdyń alǵashqy qorytyndysyn jariialady.
«Sybailas jemqorlyq táýekelderi boiynsha taldaý júrgizilgen 12 mekemege qatysty 69 usynym engizildi. Onyń ishinde 59 usynym oryndaldy, qalǵandary oryndaý satysynda. Taldaý nátijeleri boiynsha 7 laýazymdy tulǵa tártiptik jaýapkershilikke tartyldy. Bilim berý salasyndaǵy taldaý kezinde buryn sybailas jemqorlyq qylmysyn jasaǵan eki mektep direktory anyqtaldy. Olar eńbek zańnamasyna sáikes jumystan shyǵaryldy. Buryn sybailas jemqorlyq qylmysyna barǵan adamdardyń laýazymdy qyzmetke alynýy zańǵa qaishy áreket. Sondai-aq, «Eńbek» baǵdarlamasynyń iske asyrylýy boiynsha da sybailas jemqorlyq táýekelderi anyqtaldy. Biz materialdardy jedel bólimshelerimizge berdik. Jalpy halyqpen keri bailanys bar, oń ózgerister sezile bastady», – dedi Ardaq Balǵojin.
Onyń aitýynsha, departamentte sybailas jemqorlyqqa qarsy mádenietti arttyrýǵa jáne sybailas jemqorlyqqa qarsy monitoring júrgizý tásilin ózgertýge baǵyttalǵan birneshe joba jumys isteidi.
