Pavlodar oblysy Aqsý qalasynyń Aqsý shaǵyn aýdanynda órt sóndirýshi qyzmettik mindetin atqarý kezinde qaza tapty, dep habarlaidy QR TJM resmi ókili Talǵat Ýáli.
«2021 jyldyń 25 aqpanynda saǵat 7:46-da Pavlodar oblysy Aqsý qalasynyń Aqsý shaǵyn aýdanynda órt oryn alǵandyǵy týraly habarlama tústi. Tórt bólmeli turǵyn úide jalpy aýdany 80 sharshy metr órt sharpyǵan. Órt saǵat 10.16-da oqshaýlandy, saǵat 11.00-de tolyǵymen sóndirilgen. Órt sóndirýshiler qyzyl jalynmen kúresip jatqanda 1997 jyly týǵan Aqsý qalasy № 12 órt sóndirý beketi bólimshesiniń komandiri, azamattyq qorǵaý serjanty Arystanbek Mashraptyń jaǵdaiy nasharlaǵan» delingen habarlamada.
Málimetke sai, ol Aqsý aýyldyq dárigerlik ambýlatoriiasyna es-tússiz kúide jetkizilgen. Keiin dárgerler onyń qaitys bolǵandyǵyn habarlady. Oqiǵanyń mán-jaiy anyqtalýda.
«Sonymen qatar 1995 jyly týǵan № 12 órt sóndirý beketi bólimshesiniń komandiri azamattyq qorǵaý kishi serjanty Ermek Turlybekov aýrýhanaǵa jetkizilip, Pavlodar qalasynyń aýrýhanasyna jatqyzyldy. Qaitys bolǵan Arystanbek Mashrap azamattyq qorǵaý organdarynda 2018 jyldan bastap qyzmet atqardy. Pavlodar qalasynyń týmasy, úilengen» dep málimdedi vedomstvodan.
QR TJ ministrliginiń ujymy órt sóndirýshiniń mezgilsiz qaitys bolýyna bailanysty marqumnyń jaqyndary men týystaryna kóńil aitady.
Aita keteiik, 1991-2021 jyldary aralyǵynda qyzmettik mindetterin oryndaý kezinde azamattyq qorǵaý organdarynyń 53 qyzmetkeri qaitys bolǵan.
