Foto: Tengrinews.kz
Pavlodar oblysynda sot medbikege tiisken dáriger-depýtatqa aiyppul saldy, - dep habarlaidy Tengrinews.kz.
Oqiǵa Baianaýyl aýdandyq aýrýhanasynda bolǵan. Kúndizgi statsionarǵa emdelýge kelgen 59 jastaǵy dáriger inektsiia salǵan medbikeniń palatada jalǵyz qalǵanyn paidalanyp, tiise bastaǵan.
Medbike sotta er adam onyń arqasynan, belinen jáne ishinen sipalaǵanyn, keiin ony iterip jiberip jylap qashqanyn aitqan. Medbike onyń keshirim suraǵanyn telefonǵa jazyp alyp, sodan keiin politsiiaǵa aryz jazǵan.
Sot otyrysynda dáriger ázildesip, abaisyzda qolymen túrtip alǵan bolýy múmkin ekenin aityp, kinásin moiyndamaǵan.
Alaida sot QR ÁQBtK-niń 434-babynyń 1-bóligi "Usaq buzaqylyq, iaǵni jeke tulǵalardy qorlaý" boiynsha ákimshilik jaýapkershilikke tartyp, bes ailyq eseptik kórsetkish kóleminde aiyppul saldy. Aiyppul kólemi - 15 315 teńge.
Er adam sot sheshimine shaǵym túsirmek bolǵan, biraq apelliatsiialyq sot ony qoldamady.
Aita keteiik, quqyq buzýshy - Baianaýyl aýdandyq máslihatynyń depýtaty, "AMANAT" partiiasynyń múshesi.
"Kelesi sessiiada osy depýtattyń máselesin qarastyryp, sheshim shyǵaratyn bolamyz. Bul bizdiń kún tártibimizde bar. Baisaldy, eshkimge ziiany joq adam siiaqty kóringen. Ol qyzdyń ákesindei emes tipti atasyndai adam. Uiat", - dep túsindirdi Baianaýyl aýdandyq máslihatynyń hatshysy Temirbolat Qasen.
