Ekibastuz qalasynda arnaiy operatsiia barysynda esirtki tasymaldady degen kúdikpen er adam ustaldy, dep habarlaidy Pavlodarnews.kz.
Oblystyq politsiia departamenti baspasóz qyzmetiniń málimeti boiynsha, atalǵan faktige qatysty Qazaqstan Respýblikasy QK-niń 296-babyna sáikes sotqa deiingi tergeý amaldary júrgizilýde.
- Jedel izdestirý is-sharalarynyń nátijesinde esirtki qylmysyna qarsy is-qimyl bóliminiń qyzmetkerleri «Toyota Carina» markaly avtokóliginiń salonynan erekshe iisi bar ósimdik tektes zat salynǵan polietilen paket pen úsh briket aldy. Saraptama qorytyndysy boiynsha tárkilengen zattyń salmaǵy 12 keliden asatyn keptirilgen marihýana ekeni anyqtaldy, - dedi Pavlodar oblysy politsiia departamenti bastyǵynyń orynbasary Jasqairat Qaiyrov.
Kúdikti, Ekibastuz qalasynyń 25 jastaǵy turǵyny qamaýda otyr.
