Pavlodar oblysynyń aýmaǵynda «Aqbóken» aýqymdy tabiǵatty qorǵaý aktsiiasy ótkizilýde, dep habarlaidy "Ult aqparat" Ravlodarnews.kz saityna silteme jasap.
Atalmysh sharanyń negizgi maqsaty - brakonerlikpen kúresti kúsheitý, sondai-aq tabiǵatty qorǵaý zańnamasyn buzýdyń jolyn kesý.
- Jeltoqsan aiynda erkek kiikter edáýir álsireidi, sondyqtan olar brakonerler men jyrtqyshtar úshin ońai oljaǵa ainalady. Kiikterdiń jappai qyrylý ýaqyty mamyr aiynda, iaǵni tóldeý kezinde bolady. «Aqbóken» aktsiiasyn ótkizý kezeńinde kiikterdiń múiiziniń zańsyz ainalymyna qarsy kúres kúsheitilip, olardy elden tys jerlerge áketýge tosqaýyl qoiylady. Ol úshin aýmaqtyq politsiia organdarynyń ókilderi men «Ohotzooprom» ÓB» RMQK inspektorlary qatarynan mobildi toptar quryldy, - dedi onlain formatta ótken brifing barysynda «Ohotzooprom» ÓB» RMQK janýarlar dúniesin qorǵaý qyzmetiniń basshysy Erjan Isabekov.
PD bastyǵynyń birinshi orynbasary politsiia polkovnigi Jasqairat Qaiyrovtyń aitýynsha, aktsiia «Brakoner» jedel aldyn alý is-sharasy aiasynda ótýde.
- Jyl basynan beri politsiia qyzmetkerleri tabiǵatty qorǵaý zańnamasyndaǵy 760 quqyq buzýshylyqty anyqtady, onyń ishinde: 324 adam balyq aýlaý erejesin jáne 365 adam ań aýlaý erejesin buzǵan. Jalpy somasy 5,2 mln teńgeden astam ákimshilik aiyppul salyndy, - deidi Jasqairat Qaiyrov.
Aita keterligi, búgingi tańda Pavlodar oblysynda 8000-nan astam aqbóken bar. Olar kóbinese Mai jáne Baianaýyl aýdandarynda kezdesedi. Qyzyl kitapqa engen janýarlardy qorǵaý jáne saqtaý jumystary politsiia departamenti basshylyǵynyń erekshe baqylaýynda.
