Foto:elements.envato.com
Pavlodar oblysynda belgisiz zattan ýlanyp qaitys bolǵan jeti adamnyń isine qatysty tergeý bastaldy, - dep habarlaidy Tengrinews.kz.
"Atalǵan derek boiynsha QR QK 306-babynyń 3-bóligi "Abaisyzda adam ólimine ákep soqqan, qaýipsizdik talaptaryna sai kelmeitin taýarlardy shyǵarý nemese satý, jumystardy oryndaý ne qyzmetterdi kórsetý" boiynsha sotqa deiingi tergeý bastaldy", - dep habarlady óńirlik politsiia departamentiniń baspasóz qyzmeti.
Aita keteiik, bul baptyń sanktsiiasynda 4 jyldan 8 jylǵa deiin bas bostandyǵynan aiyrý jazasy qarastyrylǵan.
Sondai-aq, politseiler jeti adam ýlanyp ólgen suiyqtyq Ertis turǵynynyń konteinerinde saqtalǵanyn anyqtady. Ony politsiia ustady.
Eske salaiyq, Pavlodar oblysynyń Ertis aýylynda 7 er adam belgisiz zatpen ýlandy. Olardyń bári aýyl turǵyndarynyń birinde kanistrde saqtalǵan belgisiz suiyqtyqty ishken. Ýlanǵandardyń úsheýi úide, taǵy ekeýi Ertis aýdanynyń aýdandyq aýrýhanasynda qaitys boldy. Keiinirek taǵy bir adam qaitys boldy. Marqumdardyń arasynda áke men uly bar.
Bul derek boiynsha politseiler tekseris júrgizip, aýyl turǵyndarynyń deneleri sot saraptamasyna tapsyryldy. Sondai-aq, kanistrdegi suiyqtyq qaldyqtaryna saraptama taǵaiyndaldy.
