Pavlodar oblysynda bastaýysh synyp oqýshylary jýyq arada tegin ystyq tamaqpen qamtamasyz etiledi, dep habarlaidy "Ult aqparat" pavlodarnews.kz-ke silteme jasap.
Oblys ákimdiginiń baspasóz qyzmetiniń málimdeýinshe, mektepterdiń qamqorshylyq keńesterimen kezdesýde óńir basshysy Bolat Baqaýov aitqan.
Ákim aldymen Instagram paraqshasyna jazyp, ata-analardan ózekti máselelerdi qozǵaýyn suraǵan. Otyrysty da ata-analardan kelip túsken aryz-shaǵymdardan bastaǵan.
«Maǵan 350-den astam usynys keldi. Sonyń kóbi partalardy, kabinet terezelerin jańalaý, istemei turǵan mektep basseinderin qalpyna keltirý, jalpy bilim mekemelerin abattandyrý máselelerine qatysty», - dedi oblys ákimi.
Aitylǵan ózekti máselelerdiń taǵy biri – mekteptegi tamaqtyń sapasyna qatysty boldy. Óńir basshysy da mektep ashanalarynyń birinde tamaqtanǵan eken.
«Biz qansha qarsy bolsaq ta, mektep ashanasynda shokolad satylyp jatyr», - dedi B. Baqaýov.
Odan ári óńir basshysy jýyrda búkil oblysta 1-4 synyp oqýshylary tegin ystyq tamaqpen qamtylatynyn jetkizip, ata-analardan tamaqtyń sapasyn qadaǵalaýdy surady. Biýdjetke jergilikti investorlar men metsenattar kómektesedi.
Budan bólek, oblys ákimi mektep mańyn bóten mashinalarmen toltyrýǵa tyiym salynatynyn aitty.
Otyrysta qozǵalǵan máselelerdiń taǵy biri – 15 jastaǵy oqýshylardyń qoǵamdyq kólikte júrýine beriletin jeńildik. Qazir oblysta qisynsyz jait qalyptasqan: kolledjderdiń 1-2 kýrstary qoǵamdyq kólikte jolaqynyń jartysyn tóleidi, al olardyń mektepte oqityn qurdastaryna mundai jeńildik joq.
Bolat Baqaýov osy máselege de toqtalýǵa ýáde berdi.
