Búgin saǵat 23:00-degi aqparat boiynsha Pavlodar oblysynda 5 adamnyń koronavirýs juqtyrǵany málim boldy, dep habarlaidy "Ult aqparat".
Tótenshe jaǵdai rejimin qamtamasyz etý jónindegi Memlekettik komissiianyń Jedel shtabynyń málimetterinshe, virýsty juqtyrǵan adamdardyń tórteýi Pavlodar oblysynyń turǵyndary.
Olar: 1984, 1979, 1963 jyldary týǵan áiel adam jáne 2011 jylǵy ul bala. Turǵylyqty jeri boiynsha bailanysta bolýy múmkin bolǵany úshin úi karantini rejimin saqtap otyrǵan. COVID-19 virýsyn juqtyrǵany anyqtalǵannan keiin olar juqpaly aýrýlar statsionaryna jatqyzylǵan.
Sondai-aq, koronavirýs infektsiiasy Michýrino aýylynyń mańyndaǵy blokposttan ótpekshi bolǵan Shymkent qalasynyń turǵyny, 1986 jyly týǵan er adamnan anyqtalǵan. Onyń qolynda COVID-19 aýrýyn juqtyrmaǵanyn rastaityn anyqtama bolmaǵandyqtan, ol karantindik statsionarǵa jetkizilgen. Osylaisha, tekserý nátijeleri boiynsha onyń koronavirýsty juqtyrǵany anyqtalǵan. Ulttyq saraptaý ortalyǵynyń oblystyq bólimshesiniń mamandary páterlerde, úilerdiń kireberisterinde, karantindik gospitalde, jumys oryndarynda zararsyzdandyrý jumystaryn júrgizdi.
«Barlyq jaǵdai boiynsha bailanysta bolýy múmkin adamdar toby anyqtalyp, olardy oqshaýlaý jumystary júrgizilip jatyr. Epidemiiaǵa qarsy sharalar qolǵa alynǵan»,-delingen habarlamada.
Qazirgi tańda Pavlodar oblysynda koronavirýs infektsiiasyn juqtyrǵandar 110 adam bar.
