Pavlodar oblysynda pnevmatikalyq qarýdan jaraqat alǵan 15 jastaǵy jasóspirim kózine tigen oqpen ómir súretin bolady. Bul týraly Óńirlik kommýnikatsiialar qyzmetinde ótken baspasóz máslihatynda málim boldy, dep habarlaidy "Ult aqparat" pavlodarnews.kz saityna silteme jasap.
«Aqqýly aýdanynan naýqastyń jetkizilgenine tórt táýlik ótti. Jedel túrde kómek kórsetildi. Ókinishke qarai, oq jaraqaty saldarynan ol sol jaq kózinen aiyrylyp qaldy. Almaty kóz aýrýlary ǵylymi zertteý institýtymen bailanysqa shyqtyq. Ota oblystyq aýrýhananyń dárigerlerimen túnde jasaldy. Josparly emdeý júrgizilýde. Qazirgi tańda jaǵdaiy qanaǵattanarlyq dep baǵalanýda», - dedi oblystyq Densaýlyq saqtaý basqarmasynyń basshysy Oraz Muqashev.
Basqarma basshysynyń aitýynsha, balanyń kózine engen oq alynbaityn bolyp sheshildi. Sebebi ol tereńde ornalasqan jáne qan ketý qaýpi tym joǵary.
«Jasóspirim kórý qabiletinen jaraqat alǵan kezde-aq aiyrylǵan. Sondyqtan, tek josparly túrde kózge enýkleatsiia (kóz almasyn alyp tastaý) jasalady», - dedi ol.
Oblystyq Politsiia departamentiniń aqparatyna sáikes, 30 naýryz kúni Aqqýly aýdanynyń Sharbaqty aýylynda 18 jastaǵy jigit kóldiń jaǵasynan IJ-38 pnevmatikalyq qarýyn taýyp alyp, úidiń qaqpasyna atqan. Biraq oq metall esikke janai tiip, janynda turǵan ózge balaǵa - 2004 jylǵy jasóspirimge tigen. Ol kózine alǵan jaraqatpen oblystyq balalar aýrýhanasynyń oftalmologiia bólimshesine jetkizildi.
Dárigerler bógde zatty kózden alyp tastaý maqsatynda magnittiń kómegimen jedel ota jasady.
Atalǵan fakti Aqqýly aýdanynyń politsiia bólimshesinde tirkelgen. QR QK-niń 107-baby, 1-bóligi («Densaýlyqqa ortasha deńgeide qasaqana ziian keltirý») boiynsha sotqa deiingi tergeý júrgizilýde.
