Páterlerde gaz ballondaryn paidalanatyn almatylyqtarǵa aiyppul salynady. Bul týraly Almaty qalasy turǵyn úi saiasaty basqarmasynyń bas mamany Dinara Jýsanbekova aitty, dep habarlaidy QazAqparat.
Óńirlik kommýnikatsiialar qyzmetiniń alańynda maman málim etkendei, olar gaz jabdyqtaryn, qazandardy, ballondardy jáne qysymmen jumys isteitin ydystardy áleýmettik infraqurylym obektilerinde paidalaný qaýipsizdigi boiynsha ailyqtardy únemi ótkizip turady.
Mysaly, 2021 jyldyń 11 aiynda 70-ten astam bazar, 78 saýda úileri jáne 1160-tan astam qoǵamdyq tamaqtaný obektileri tekserildi. Almatynyń 383 qoǵamdyq tamaqtaný nysandarynda gaz ballondarynan aqaý shyqty.
Qoldanystaǵy «Gaz jáne gazben jabdyqtaý týraly» zańnamaǵa sáikes turǵyn úi saiasaty basqarmasy turmystyq jáne kommýnaldyq-turmystyq tutynýshylardyń, sondai-aq turmystyq ballondardyń gaz jabdyǵyn qaýipsiz paidalaný talaptarynyń saqtalýyna memlekettik baqylaý júrgizedi.
Máselen, ótken jyly TKB qyzmetkerleri megapolistiń kópqabatty úilerindegi gaz ballondaryn paidalaný boiynsha jospardan tys 15 tekserý júrgizdi.
Nátijesinde 48 myń teńgeden astam aiyppul túrindegi ákimshilik jaýapkershilikke 5 turǵyn tartyldy.
Eske salsaq, QR-da kóp qabatty turǵyn úilerde turmystyq gaz ballondaryn saqtaýǵa jáne paidalanýǵa tyiym salynǵan.
«Biz Almatyda gazdy paidalanýǵa bailanysty jazataiym oqiǵalardy boldyrmaý boiynsha qabyldanyp jatqan sharalarǵa qaramastan, qoǵamdyq tamaqtaný obektileri men saýda bazarlarynda basshylyq pen personal tarapynan nemqurailylyqty kórip otyrmyz. Bul ǵimarattar men qurylystardyń buzylýyna, sondai-aq túrli zardaptarǵa ákelýi múmkin. Taǵy eske salamyz, páterlerde gaz ballondaryn paidalanatyn almatylyqtarǵa aiyppul salynady», - dedi Almaty qalasy turǵyn úi saiasaty basqarmasynyń lift, gaz jáne qazandyq jabdyqtaryn baqylaý bóliminiń bas mamany Dinara Jýsanbekova.
