«Otbasy bank» AQ basqarma tóraǵasy Lázzat Ibragimova baspana baǵasynyń qymbattaýyna ne yqpal etkenin túsindirdi, dep habarlaidy QazAqparat.
«Qazirgi álemdik úrdisterdi qaraityn bolsaq, barlyq elderde jyljymaityn múlik baǵasy qymbattap jatyr. Halyk research toby 2021 jyldyń birinshi jartyjyldyǵyna zertteý júrgizdi, onda Batys Eýropada da, Soltústik Amerika elderinde de, Kanadada, AQSh-ta da jyljymaityn múlik baǵasynyń óskenin kórsetti. Eýrostattyń infografikasynan da Shvetsiia siiaqty Skandinaviia elderinde baǵanyń 10%-dan astam óskenin kóremiz. Eger zeinetaqy jinaǵynyń jyljymaityn múlik baǵasynyń ósýine qatysý úlesin baǵalasaq, faktorlardyń tórtten bir bóligi yqpal etti dep oilaimyn», - dedi Lázzat Ibragimova Ortalyq kommýnikatsiialar qyzmetinde ótken baspasóz máslihatynda.
Spikerdiń aitýynsha, biyl satý jáne satyp alý mámileleriniń sany ótken jylmen salystyrǵanda áldeqaida kóp bolǵan.
«Osylaisha, munda kóptegen faktorlar ról atqardy. Buǵan tek zeinetaqy jinaǵy ǵana áser etti dep aitýǵa bolmaidy. Jyljymaityn múlik baǵasynyń ósýi barlyq jerde baiqalyp otyr, oǵan qosa azyq-túlik jáne ózge de taýarlar baǵasynyń ósýine yqpal etetin infliatsiialyq protsester bar. Qurylys materialdarynyń jekelegen toptaryn alyp qarasaq, armatýra men beton qymbattady. Eńbekaqy mólsheri ózgerdi, kranshylarǵa, qurylys-montaj jumysymen ainalysatyndarǵa suranys artty. Sondyqtan bul jerde BJZQ ǵana áser etti dep aitýǵa bolmaidy», - dedi L. Ibragimova.
