Sailaý naýqany jariialanǵaly barlyq partiialar sezderin ótkizdi. 5 partiia óz kandidattaryn usynyp, baǵdarlamalaryn da jariialady. Saiasi partiialar qoǵamda qordalanǵan áleýmettik, ekonomikalyq, saiasi máselelerdi kótergeni, ony sheshýdiń ózindik joldaryn usynǵany baiqalady.
Búgin 30 qarasha kúni saǵat 18:00-de partiialardyń Májiliske kandidattar usyný protsesiniń sońǵy kúni. 4 jeltoqsanda maslihattarǵa kandidattar usyný da aiaqtalady. 10 jeltoqsanda saiasi partiialar úgit-nasihat jumystaryna kóshedi. Sailaý naýqanynyń naǵyz qyzǵan ýaqyty 10 jeltoqsanda bastalady dep oilaimyn.
Bul jolǵy sailaý naýqanynyń bir ereksheligi partiialar qoǵamǵa tanymal azamattardy qataryna kóptep tarta bastady. Osy arqyly elektorattyń nazaryn ózine aýdarýǵa, halyqtyń daýsyn kóbirek tartýǵa tyrysatyndyǵy anyq. Partiialardyń ishinde eń kóp kandidat usynǵan "Nur Otan" partiiasy. Praimeriz arqyly 11 myńǵa jýyq qatysýshylardyń ishinen qoǵamda bedeldi tulǵalardy ár regionnan tarta bildi. Bilikte otyrǵan partiia 800 mektep salý, magistranttar men doktoranttardyń stipendiiasyn 1,5 esege ósirý, áleýmettik jáne ekonomikalyq bastamalardy kótergen myqty baǵdarlamamen shyqty.
Kez kelgen sailaý bizdi demokratiiaǵa bir saty jaqyndata berýi tiis. Aldaǵy sailaý da qoǵamdyq damý men saiasi mádenietti bir saty alǵa jyljytatyn protsess bolýy kerek. Sailaýǵa qatysý, daýys berý, baqylaýshy bolý arqyly biz saiasi mádenietti kóteremiz ári demokratiialyq qundylyqtardy qalyptastyramyz. Bul óte mańyzdy qadam.
Jalpy alǵanda barlyq saiasi partiialar sezderin ótkizip, kandidattar usyný protsesin sátti aiaqtady deýge tolyq negiz bar. Osy turǵyda sailaýǵa qatysty daiyndyqty jasap, komissiia quramyn bekitip, sailaý ýchaskelerin daiyndap, bul aqparattardy halyqqa ashyq jariialap otyrǵan Ortalyq sailaý komissiiasynyń jumysy da effektivti iske asyp keledi. Kez kelgen el azamaty sailaý naýqanyna qatysty aqparattarmen Ortalyq sailaý komissiiasynyń saitynan tanys bola alady.
Serikbaev Baýyrjan, saiasattanýshy
