Túrkistan oblysynda dáleldemelerdi burmalaǵany úshin Qarjylyq monitoring agenttiginiń eki qyzmetkeri sottaldy, dep habarlaidy "Ult aqparat" vedomstvonyń baspasóz qyzmetine silteme jasap.
Agenttiktiń málimdeýinshe, vedomstvo óz qataryndaǵy buzýshylyqtarǵa qarsy turaqty kúres júrgizedi jáne kez kelgen quqyqqa qarsy áreketterdiń jolyn kesedi.
«Agenttiktiń Jeke qaýipsizdik departamenti Túrkistan oblysy boiynsha aýmaqtyq departamenttiń eki qyzmetkeriniń dáleldemelerdi burmalaǵany úshin para alý deregin anyqtady. Eki qyzmetker Sadyqov pen Shoraev, qyzmet babyn paidalana otyryp, alkogol ónimderin ruqsat qujatsyz jáne jalǵan esepke alý-baqylaý markasymen satý boiynsha zańsyz kásipkerlik qyzmet deregin jasyrýǵa járdemdesken», delingen habarlamada.
Olar aldyn ala sóz bailasý arqyly kinásiz kýágerdi ákimshilik jaýapkershilikke tarta otyryp, naqty kinálige qatysty qylmystyq isti zańsyz toqtatqan.
«Qylmystyq istiń derekterin burmalaǵany úshin Sadyqov pen Shoraev 500 myń teńge kóleminde aqshalai syiaqy alǵan. Qyzmetkerler sottaldy», delingen habarlamada.
Vedomstvo qarjylyq monitoring organdary qyzmetkerleri tarapynan quqyqqa qarsy áreketke tap bolsa +7 (7172) 708 478 telefonyna qońyraý shalýdy nemese dsb@afmrk.gov.kz poshtasyna jazýdy suraidy.
