Pandemiia órshigen tusta alaiaqtar men qarjy piramidalary qazaqstandyqtardan 417 mlrd teńge aldap alǵan. QR Bas prokýrory Ǵizat Nurdáýletov Májilis ókilderiniń depýtattyq saýalyna bergen jaýabynda osy tendentsiiamen kúres qalai júrip jatqanyn baiandady, dep habarlaidy QazAqparat.
Quqyqtyq statistika jáne arnaiy esepke alý jónindegi komitettiń deregi boiynsha, 2020 jylǵy naýryz ben 2021 jylǵy sáýir aralyǵynda «alaiaqtyq» jáne «qarjy piramidasyn qurý jáne oǵan basshylyq etý» baptarymen qatysy bar 41 307 quqyq buzýshylyq tirkelgen. Osy ister boiynsha zardap shekkenderdiń jalpy sany 40 833 adamǵa jetken. Al kelgen zalaldyń mólsheri 417 milliard teńge bolǵan.
Bir top Májilis ókiliniń QR Bas prokýrory Ǵizat Nurdáýletovke joldaǵan depýtattyq saýalynda osyndai problema kóterilgen.
Bas prokýror saýalǵa bergen jaýabynda bul ispen qazir Qarjy naryǵyn retteý jáne damytý agenttiginiń janynan qurylǵan arnaiy komissiia ainalysatynyn aitady.
«Qarjy piramidalaryn anyqtaý jáne jolyn kesý, materialdaryn quqyq qorǵaý organdaryna berý úshin Bas prokýratýranyń bastamasymen Qarjy naryǵyn retteý jáne damytý agenttigi janynan (Ulttyq bank, AFM, Qarjymini, AQDM, IIM-men birlesip) vedomstvoaralyq jumys toby quryldy», - dep jazdy Ǵizat Nurdáýletov depýtattyq saýalǵa jaýabynda.
Onyń aitýy boiynsha, vedomstvoaralyq jumys tobynyń aiasynda memlekettik organdar arasyndaǵy ózara is-qimyl jáne qarjylyq piramida belgileri bar uiymdardyń qyzmetin toqtata turý sharalardy qabyldaý tetigi ázirlengen.
Sondai-aq, internet-resýrstar buǵattalyp, BAQ-ta túsindirý jumystary júrgizilip keledi.
«Bul jumystar 12 qarjy piramidasyn erte bastan anyqtap, birden qyzmetin toqtatýǵa múmkindik berdi. Atalǵan nysan ieleriniń ústinen sotqa deiingi tergeý bastaldy. Qarjy piramidalaryna jáne zańsyz qarjy operatsiialaryna qarsy is-qimyl jónindegi jumys turaqty baqylaýda. Bas prokýratýra osy saýaldy nazarǵa ala otyryp, zańdylyqty nyǵaitý jáne azamattardyń quqyqtaryn qorǵaýdy kúsheitý boiynsha odan ári birlesken jumysqa daiyn», - dep túiindedi bas prokýror.
