Pandemiia musylman álemin odan saiyn biriktire tústi. Bul týraly Álemdik jáne dástúrli dinder kóshbasshylary sezi hatshylyǵynyń HIH otyrysynda Qazaqstan musylmandary dini basqarmasynyń tóraǵasy, bas múfti Naýryzbai qajy Taǵanuly aitty, dep habarlaidy QazAqparat.
«Kez kelgen dástúrli din halyqty adamgershilik pen izgilikke úndeidi. Din – adamdyq qasietti qalyptastyratyn teńdessiz tárbie mektebi. Demek, biz dinniń osynaý qýatty kúshin adamdar arasyndaǵy dostyq, ózara syilastyq pen qurmetti arttyrýǵa baǵyttaýymyz kerek. Álemdik jáne dástúrli din liderleri seziniń bastamashysy Qazaqstannyń Tuńǵysh Prezidenti – Elbasy Nursultan Nazarbaevtyń: «Halyqtardy bir-birinen bóletin teńizder emes, nadandyq pen tilderdiń bólektigi de emes, arazdyq qana. Dostyq joq jerde arazdyqqa múmkindik mol bolmaq» degen sózinde úlken maǵyna jatyr. Prezidentimiz Qasym-Jomart Kemeluly Toqaev halyqqa Joldaýynda: «Qoǵamdaǵy birlik pen kelisimdi kózdiń qarashyǵyndai saqtaýymyz kerek. Etnosaralyq jáne konfessiiaaralyq qatynastyń qanshalyqty mańyzdy ekenin barlyq azamatymyz túsiný qajet. Biz qashan da alaýyzdyqqa qarsy tura bilgen elmiz» dep atap ótti. Rasynda, biz beibitsúigish halyqpyz jáne álem halqyn beibit ómir súrýge úndeimiz. Elimizde turaqty túrde ótip kele jatqan Álemdik jáne dástúrli din liderleriniń sezi osyǵan dálel», - dedi Bas múfti.
Onyń atap ótýinshe, álemdi jailaǵan pandemiialyq ahýal kóptegen ortaq igi is-sharalardyń ótýine tosqaýyl boldy. Alaida bul synaq musylman álemin odan saiyn biriktire tústi.
«Biz álemniń din kóshbasshylaryna «Biz – birgemiz, tilegimiz – ortaq» degen igi nietpen Úndeý joldap, juma kúni bir mezette duǵa jasaýǵa shaqyrdyq. Úndeýge birqatar musylman elderi qoldaý bildirip, onlain rejimde duǵa jasaý rásimine qatysty. Osy sátti paidalanyp, din kóshbasshylaryna taǵy da Alla razy bolsyn aitamyn. Bul bastama din qairatkerlerin ortaq maqsatqa jumyldyrdy», - dedi Naýryzbai qajy Taǵanuly.
