QR Densaýlyq saqtaý ministri Aleksei Tsoi Astana Media Week forýmynda pandemiia kezindegi halyqqa aqparat taratý jumysy týraly pikir bildirdi, dep habarlaidy QazAqparat.
«COVID-19 koronavirýs pandemiiasy búkil adamzat úshin jahandyq syn-tegeýrin boldy, myqty ekonomikalar men áleýmetterge, jekelegen qoǵamdastyqtarǵa jáne árbir otbasyna soqqy boldy. Virýstyń keń taralýy men halyq arasynda aýrýdyń órshýi saldarynan daǵdarystarǵa eń tózimdi densaýlyq saqtaý júiesi de qolda bar resýrstarǵa buryn-sońdy bolmaǵan júktemege tótep bere almai, osaldyǵyn kórsetti. Dúniejúzilik densaýlyq saqtaý uiymy ótken jyly infektsiiamen kúresý strategiiasynda pandemiianyń úsh belgisin anyqtady. Birinshisi – jyldamdyq pen masshtab. Aýrý álemniń túkpir-túkpirine tez taraldy, taralýdyń bul sipatyna bailanysty tipti eń turaqty densaýlyq saqtaý júieleri de buzyldy. Ekinshisi – aýyrlyq dárejesi, ortasha alǵanda jaǵdailardyń 20%-y aýyr nemese kúrdeli boldy, jasyna qarai jáne qatar júretin qandai da bir aýrýlar bolǵan kezde kúsheiedi. Úshinshisi – áleýmettik-ekonomikalyq turaqsyzdyq, densaýlyq saqtaý jáne áleýmettik qorǵaý júieleri bastan ótkergen kúizelis jáne keń jáne tereń áleýmettik-ekonomikalyq saldarǵa ákep soqqan virýstyń taralymyn baqylaý úshin qabyldanǵan sharalar», - dedi Tsoi Astana Media Week forýmynyń «Jańa, kovidtan keiingi álemdegi qoǵam jáne BAQ» paneldik sessiiasynda.
Ministr pandemiia bastalǵan kezde turǵyndar tolyqqandy aqparattyń bolmaýynan úlken qysymǵa ushyraǵanyn, óitkeni COVID-19 jańa bolǵanyn jáne álemde jaǵdaidy naqty túsiný bolmaǵanyn atap ótti.
Ǵylymnyń virýsty zertteýdegi árbir qadamy jeke túsiniktemelerimen birge júrdi.
Keibir dári-dármek, PTR test, jeke qorǵanys quraldary jetispedi, bul dúrbeleńge ákep soqty.
Memleket tez jumylyp, Úkimette jeke jumys toby jáne vedomstvoaralyq komissiia quryldy.
Tsoi atap ótkendei, Qazaqstanda qurylǵan zerthanalardyń áleýetiniń arqasynda qazir táýligine 120 myń PTR test júrgizýge bolady.
17 juqpaly aýrýlar aýrýhanasy salyndy, barlyq óńirler 100% «jedel járdem» mashinalarymen qamtamasyz etildi, dárilik zattardyń turaqtandyrý qorlary quryldy. Jalpy jaǵdai baqylaýǵa alyndy.
Tsoi pandemiia kezinde qoǵammen bailanys ornatý óte mańyzdy ekenin, sondyqtan halyqqa obektivti aqparat berý arnalary birinshi orynǵa shyqqanyn atap ótti.
Halyqty aqparattandyrýdyń durys strategiiasyn tańdap, aqparat kózderin ázirleý mańyzdy boldy.
Bul - coronavirus-2020 saity, Aqparat jáne qoǵamdyq damý ministrlikteriniń, Densaýlyq saqtaý ministrlikteriniń portaldary jáne basqa da akkaýnttar boldy.
«Koronavirýsqa qarsy vaktsinanyń paida bolýy da mańyzdy oqiǵa boldy. Qazirgi ýaqytta Qazaqstanda 7,5 mln adam vaktsina aldy. Vaktsinanyń mańyzy túsindirildi, onyń qasietteri týraly aityldy, óitkeni bul jańa ázirlemeler bolǵandyqtan bastapqyda halyq vaktsinaǵa synmen qarady. Endi adamdar vaktsinanyń virýstan qorǵaitynyna kóz jetkizip, oń qabaq tanytyp otyr. Al halyqty vaktsinadan qorqýǵa itermeleitin «antivakserlerdiń» árekertin destrýktivti deýge bolady, al vaktsinalaý – kez kelgen juqpaly aýrýlardyń aldyn-alýdyń jalǵyz ádisi. Densaýlyq saqtaý ministrligi pandemiia kezeńinde infektsiia týraly jalǵan aqparattardy anyqtap, halyqqa mundai faktilerdiń shyndyqqa sáikes kelmeitinin túsindirýde», - dedi Aleksei Tsoi.
