QR Prezidentiniń Ekonomikalyq damý máseleleri jónindegi keńesshisi Ser Sýma Chakrabarti «Ult múddesi» baǵdarlamasynda halyqty vaktsinalaý nátijeciniń ekonomikaǵa qanshalyqty áser etetinin túsindirdi, dep habarlaidy QazAqparat tilshisi.
«Meniń oiymsha, daǵdarystyń qansha ýaqytqa sozylatynyn naqty bilemin dep aitý aqymaqtyq bolar edi. Mysalǵa meniń elim Ulybritaniiany alaiyq. Rojdestvo, demalystar kezinde virýs juqtyrǵandar sany turaqtanǵandai bolǵan. Omikron paida bola ketti. Qazir Ulybritaniia shekteý sharalaryn qaita jandandyrýǵa májbúr. Lokdaýndar kúshine enip, maska kiiý talap etile bastady. Birneshe apta buryn bulai bolaryn eshkim kútken joq», - dedi Qazaqstan Prezidentiniń keńesshisi.
Baǵdarlama tizginshisi odan halyqty vaktsinalaý nátijeleriniń ekonomikaǵa qanshalyqty áser etetinin surady.
«Iá, bul jerde kúmán bolmaýy kerek. Biyl Qazaqstan ekonomikasy jaqsy ósim kórsetti dep oilaimyn. Óitkeni vaktsinatsiia jedel júrgizildi. Qazir 8,2 mln adam ekpe aldy. Kóbi vaktsinanyń údetkish, úshinshi dozasyn tez alyp jatyr. Bul eldegi ekonomikalyq qatynastardyń jyldam qalpyna kelýine kómektesedi. Adamdar jumysty qaita bastaý, biznesti ashý úshin ózderin qaýipsiz sezinýi kerek. Bul kez-kelgen salada mańyzdy. Vaktsinatsiia bolashaqta da mańyzdy faktor bolyp qalady. Biz olardy jetildirip, jańa nusqalardy ázirleitin bolamyz. Búginde ǵylymnyń biznesti qoldaýdaǵy jáne jumys oryndaryn saqtaýdaǵy róli artty», - dedi Sýma Chakrabarti.
