Álemniń pandemiiany jeńýi úshin meditsinalyq múmkindikterin qosqanda, barlyq quraldary bar. Alaida olar tiisti deńgeide qoldanylmaidy. Bul týraly jeksenbi kúni Dúniejúzilik densaýlyq saqtaý uiymynyń (DDSU) bas direktory Tedros Adanom Gebreiesýs málim etti, dep habarlaidy QazAqparat TASS agenttigine silteme jasap.
Berlinde ótip jatqan Densaýlyq saqtaý sammitinde Gebreiesýs álem qaýymdastyǵyn jyldyń sońyna deiin barlyq elderde vaktsinanalaýmen qamtýdy kem degende 40%-dan asyrýǵa shaqyrdy. Ol ózine pandemiianyń qashan aiaqtalatyny týraly suraqtyń jii qoiylatynyn málimdedi.
«Meniń jaýabym mynadai: Pandemiia álem ony toqtatýdy tolyq qalap iske kiriskende kezde ǵana aiaqtalady. Bári óz qolymyzda», - dedi DDSU basshysy.
Ol álem qaýymdastyǵynyń pandemiiany jeńýi úshin barlyq qajet quraldardyń bar ekenin atap ótti. Olardyń qatarynda qoǵamdyq densaýlyqty saqtaý jáne meditsinalyq múmkindik bar.
«Alaida álem óz múmkindigin tiisti deńgeide qoldanǵan joq. Kúndelikti 50 myń adam virýstan qaitys bolyp jatyr, pandemiia aiaqtalǵan joq. Munyń ózi tek bizge belgili statistika», - dedi bas direktor.
Ol DDSU-nyń buryn jariialaǵan maqsatyn atap ótti. Ol – 2021 jyldyń sońyna deiin ár el halqyn kem degende 40% vaktsinalaýmen qamtý. Bul vaktsinany jetkizýdi baqylaityn elder men kompaniialar aitqandaryn oryndaǵan jaǵdaida ǵana júzege aspaq, dedi Gebreiesýs.
Ol halqynyń 40%-y vaktsina saldyrǵan elderdi COVAX halyqaralyq mehanizmi men Afrikanyń vaktsina satyp alý jónindegi maqsatty tobyna (AVAT) preparattar jetkizip otyrýǵa shaqyrdy. Olardyń qatarynda G20 elderi bar.
