Gúlnar Karimovaǵa qatysty jańa is qozǵaldy, dep habarlaidy Ózbekstan Respýblikasynyń Bas prokýratýrasynyń baspasóz qyzmeti.
Qadaǵalaý organynyń baspasóz qyzmetindegiler atap ótkendei, Ózbekstannyń Bas prokýratýrasy men Ádilet ministrligi AQSh, Shveitsariia, Frantsiia, Resei Federatsiiasy jáne Latviia siiaqty shet memlekettermen G.Karimovanyń qylmystyq jolmen alynǵan 1,3 mlrd. AQSh dollary tabysyn qaitarý máselesi boiynsha birlesip jumys júrgizip jatyr, sonymen qatar jekelegen elderde de qylmystyq isteri tergelýde.
«Osy jumys aiasynda halyqaralyq qurylymdar men azamattardan G.Karimovanyń burynǵy tergeýlerde qamtylmaǵan jańa qylmystary týraly derekter kelip tústi. Bul jańadan ashylǵan mán-jailar jańa qylmystyq is qozǵaýǵa negiz boldy. Tergeý barysynda G.Karimova birneshe adamnan turatyn kóptegen uiymdasqan qylmystyq top quryp, qylmystyq qaýymdastyqty basqarǵan. G.Karimova jáne onyń sybailastary uiymdasqan toptardyń quramynda jasaǵan qylmystary úshin sot taǵaiyndaǵan jazany ótep jatyr», - delingen habarlamada.
«Qazirgi ýaqytta tergeý G.Karimovanyń respýblikanyń ónerkásip kásiporyndarynda jumys isteitin taǵy bir uiymdasqan qylmystyq tobynyń bar ekenin anyqtady, bul top oǵan qylmystyq jolmen alynǵan kiristerdiń bir bóligin berip otyrǵan. Sonymen qatar, G.Karimova qysym kórsetý jáne qorqytý arqyly azamattar men túrli kompaniialardyń ielerin ózderi basqaratyn kompaniialarǵa múlikterin qaita tirkeýge májbúrlegen. Tergeýdegi qylmystyq is aiasynda keltirilgen zalaldyń mólsheri 165 mln. AQSh dollarynan astam jáne 85 mlrd-ty quraǵan. Osyǵan bailanysty, bopsalaý, iemdený jolymen tonaý nemese urlaý, Ózbekstannyń múddelerine qaishy mámile jasasý jáne eldiń qylmystyq kodeksiniń tiisti baptarynda qarastyrylǵan qylmystyq qoǵamdastyq qurýmen bailanysty jasaǵan qylmystar úshin jańa aiyp taǵyldy», - dep atap ótti Bas prokýratýranyń baspasóz qyzmeti.
«Tashkenttiń Iashnabad aýdandyq qylmystyq sotynyń úkimimen G.Karimovaǵa qatysty qamaýǵa alý túrindegi bultartpaý sharasyn qoldandy. Isti tergeý barysynda G.Karimovanyń quqyqtary men zańdy múddelerin qorǵaýdy ózi jáne onyń jaqyn týystary ákelgen 7 qorǵaýshysy júzege asyrady. Sonymen qatar, barlyq tergeý áreketterine qorǵaýshylardyń qatysýy jáne onymen shekteýsiz jeke kezdesý múmkindigi qamtamasyz etilgen», - dep habarlaidy Ózbekstan Respýblikasy Bas prokýratýrasynyń baspasóz qyzmeti
Qazirgi ýaqytta isti tergeý aiaqtaldy, G.Karimova qorǵaýshylardyń qatysýymen qylmystyq istiń materialdarymen tanysýda.
