Ózbekstanmen shekaradaǵy Baǵys jáne Hiebon aýyldary resmi túrde Túrkistan oblysyna qosyldy. Úkimet qaýlysy premer-ministrdiń saitynda jariialandy, - dep habarlaidy Tengrinews.kz.
"Osy qaýlyǵa qosymshaǵa sáikes Baǵys jáne Hiebon eldi mekenderiniń jalpy alańy 795,62 gektar jerin Túrkistan oblysynyń shekarasyna qosý arqyly Túrkistan oblysynyń shekarasy ózgertilsin", - delingen Úkimet qaýlysynda.
Aýdany 750 gektar Baǵys aýyly Aqjar aýyldyq okrýgine, aýdany 45,62 gektar Hiebon aýyly Túrkistan oblysy Saryaǵash aýdany Qurkeles aýyldyq okrýginiń shekarasyna qosylady.
Qazaqstan men Ózbekstan shekarasynyń ýchaskeleri týraly shartqa eki eldiń tuńǵysh prezidentteri 2002 jyly qol qoiǵan. Endi osyǵan deiin Ózbekstanǵa tiesili bolǵan bes eldi mekeni bar Baǵys kenti men Arnasai bógeti shart boiynsha Qazaqstanǵa berildi.
Shekara mańyndaǵy Baǵys aýyly Ońtústik Qazaqstan oblysynyń Saryaǵash qalasynan 40 shaqyrym jerde ornalasqan. 2009 jylǵy sanaq boiynsha, aýylda 1143 adam (563 er adam jáne 580 áiel adam) turǵan.
Onda 19 jyl resmi tirkeýsiz turǵan úiler de bar. Eldi meken resmi túrde Qazaqstan kartasyna engizilmegen. Bul máseleni turǵyndar da birneshe ret ákimdikke baryp kótergen.
Alaida oblys ákimdigi Baǵys aýylynyń problemalaryn sheshýde eki eldiń Syrtqy ister ministrligi sheshýi tiis "zańdy aspektiler" bar dep eseptegen.
Úkimetke Baǵys jáne Hiebon aýyldarynyń jaǵdaiyn anyqtaýdy el Prezidenti Qasym-Jomart Toqaev tapsyrǵan. 16 naýryzda premer-ministrdiń orynbasary Eraly Toǵjanov bastaǵan jumys toby aýyl turǵyndarymen kezdesti. Sol kezde turǵyndar menshik pen jer telimderin rásimdeý múmkindigi joq ekenin aityp másele kótergen bolatyn. Turǵyndardyń aitýynsha, aýyl sharýashylyǵy men mal sharýashylyǵy úshin jer men sýarmaly sýdyń jetispeýshiligi de ótkir másele bolyp otyr. Sonymen qatar, aýyldarda gaz joq.
Kezdesý qorytyndysy boiynsha premer-ministrdiń orynbasary oblys ákimdigine turǵyndardyń problemalyq máselelerin sheshý boiynsha barlyq sharany qabyldaýdy tapsyrdy.
Nátijesinde eldi mekenderge resmi mártebe berildi, olardyń shekaralary bekitildi, jer ýchaskeleri men múlikterin túgendeý aiaqtaldy. Shildede óńirdiń alty aýyly tabiǵi gazben qamtamasyz etilmek, al kelesi jyly Baǵys aýylynda 300 oryndyq mektep salynady.
Sonymen qatar, Qazaqstan SIM ókilderi Baǵys aýyly aýdanyndaǵy memlekettik shekara ýchaskesin demarkatsiialaý 2004 jyly júrgizilgenin habarlady. Qazaqstan-Ózbekstan memlekettik shekarasyn demarkatsiialaý týraly shart jasasý arqyly Ózbekstanmen shekarany demarkatsiialaýdy aiaqtaý bir-eki jyl ishinde josparlanyp otyr. Bul rette, ministrliktiń paiymdaýynsha, bul sharttyń bolmaýy Baǵystaǵy jer ýchaskelerin rásimdeý jónindegi jumystardy júrgizýge quqyqtyq jaǵynan kedergi emes.
