5 shildede Ózbekstannyń shekara aýmaǵyna boljam boiynsha Aýǵanstan jaqtan ushyp kelgen bes reaktivti snariad qulady, dep habarlaidy «QazAqparat» menshikti tilshisi Ózbekstan Respýblikasynyń Syrtqy ister ministrligine silteme jasap.
«2022 jyldyń 5 shildesinde saǵat 16.20-da Ózbekstannyń shekara aýmaǵyna bes reaktivti snariad qulady. Aldyn ala málimet boiynsha, olar Aýǵanstan aýmaǵynan ushyrylǵan», - dedi SIM.
Vedomstvoda atap ótkendei, snariad qulaǵanda jarylmaǵan, eshkim zardap shekpegen jáne eshteńe qiramaǵan. Termez qalasy «Majnýntol» mahallasyndaǵy tórt jer úige bolmashy zaqym kelgen, besinshi snariad fýtbol alańynan tabyldy. Tabylǵan snariadtardy saperler zalalsyzdandyrdy.
Qazirgi ýaqytta Ózbekstannyń jaýapty organdary aýǵan tarapymen birlesip oqiǵanyń sebebin anyqtap jatyr.
