Ózbekstan prezidenti Shavkat Mirziiaev Qaraqalpaqstan aýmaǵynda tótenshe jaǵdai engizdi. TJ 3 shildeden bastap 2 tamyzǵa deiin kúshinde bolady. Bul jóninde prezidenttiń baspasóz hatshysy Sherzod Asadov habarlady, dep jazady Azattyq.
Ózbekstan basshysy mundai qadamnyń mánin "azamattardyń qaýipsizdigin qamtamasyz etý, quqyqtary men erkindikterin qorǵaý jáne tártipti qalypqa keltirý qajettigimen" túsindirdi.
Tótenshe jaǵdai kezinde keshki saǵat 9 ben tańǵy saǵat 7 aralyǵynda komendanttyq saǵat ta engiziledi. Komendatýra basshysy bolyp Ózbekstan Ulttyq gvardiiasynyń qolbasshysy Rýstam Joraev taǵaiyndaldy.
Azattyqtyń Ózbek qyzmetiniń habarlaýynsha, TJ kezinde kólik qozǵalysy shektelip, azamattardyń qujattary, zattary, kólikteri tekserilmek. Qaraqalpaqstanǵa kirip-shyǵý shekteledi, qoǵamdyq shara ótkizýge tyiym salynady.
Osy apta sońynda Qaraqalpaqstan astanasy men aimaqtyń ózge qalalarynda jappai narazylyq bolyp, turǵyndar Qaraqalpaqstandy "egemen" (sýverenitet) statýsynan jáne Ózbekstan quramynan shyǵý quqyǵynan aiyrýǵa qarsy shyqqan. Aqparatqa qaraǵanda, narazylyq dóreki kúshpen basylǵan. Qansha adamnyń jaralanǵany nemese qaza bolǵany belgisiz. Ózbekstan biligi ol týraly resmi aqparat taratpady. Alaida áleýmettik jelide Qaraqalpaqstannyń ár jerinen taraǵan videolarda jaralanǵan nemese qanǵa bókken adamdar baiqalady.
Ózbekstan biligi narazylyqty "Konstitýtsiia reformasynyń durys túsindirilmegendigimen" bailanystyrdy. Qaraqalpaqstan biligi "basqarý organdaryn basyp alý talpynysy" bolǵanyn aityp, "syrtqy kúshter" týraly málimdedi. 2 shildede Ózbekstan prezidenti Shavkat Mirziiaev Konstitýtsiianyń Qaraqalpaqstan mártebesine qatysty bóligi ózgertpeýdi usyndy.
Qazir Qaraqalpaqstandaǵy jaǵdai belgisiz. Aimaqta áli de internet bailanysy nashar.
