El aýmaǵynda koronavirýs infektsiiasynyń rastalýyna bailanysty Ózbekstan halyqaralyq baǵyttyń barlyq túri boiynsha shekarany jaýyp tastady, dep habarlaidy "Ult aqparat".
Shekaranyń jabylatyny týraly Ózbekstannyń premer-ministri Abdýlla Áripov málimdedi. Ol COVID-19 virýsynan eskertý jáne onyń taralýyna jol bermeý boiynsha arnaiy respýblikalyq komissiiany basqarady.
Atap aitqanda, 16 naýryzdan bastap shekaradan Ózbekstan aýmaǵyna kólikpen kirýge tyiym salynady. Sonymen qatar áýe saparlary ishinara toqtatylyp, temir jol reisterine keri qaitý úshin 3 kún beriledi.
Sheteldegi Ózbekstan azamattary úshin qajettilik týyndaǵan jaǵdaida charterlik reister oryndalady. Otanyna oralýdy kózdegen ózbekstandyqtar eki aptalyq karantinge jatqyzylady. Karantin tártibin buzǵan azamattar qylmystyq jaýapkershilikke tartylady.
Sonymen qatar, barlyq memlekettik organ men memlekettik emes uiymdarda jiyndardy ótkizýge tyiym salynady. Dini uiymdarǵa buqaralyq sharalardy ótkizýdi shekteýge keńes beriledi. Buǵan qosa mektepke deiingi, orta jáne joǵary bilim berý uiymdary ýaqytsha karantinge jabylady. Naýryz merekesine orai merekelik jiyndar bolmaidy.
Aita ketsek 15 naýryzda Ózbekstanda koronavirýs juqtyrýdyń alǵashqy jaǵdaiy tirkelgen edi.
