Ózbekstan Respýblikasy Ǵylym Akademiiasynyń Genomika jáne bioinformatika ortalyǵynyń ǵalymdary qyzanaqtan COVID-19 infektsiiasyna qarsy vaktsina jasady, dep habarlaidy QazAqparat ÓzA-ǵa silteme jasap.
«Qyzanaqty as retinde paidalanǵanda ol asqazanda ydyrap, antidene túzedi. Tájiribe aiasynda bizder Ózbekstanda tabylǵan koronavirýsty alyp, onyń bir bóligin klondap, ósimdik jasýshasyna engizý arqyly tekserip kórdik. Nátijesinde vaktsina shynymen ósimdik jasýshasynan bólinýde», - deidi Ortalyq direktory Zabardast Býriev.
Onyń aitýynsha, azyq-túlikpen vaktsina jasaý tájiribesi Resei men Kanadada sút pen júgeri siiaqty ónimderde qoldanylýda. Olardyń klinikalyq synaqtary da aiaqtalýǵa jaqyn.
Ortalyq direktorynyń málimetine qaraǵanda, qyzanaqta sintezdelgen koronavirýstyń S-aqýyzy asqazan arqyly ishekke enip, immýndyq júieni oiatady. Osylaisha paida bolǵan antideneler qozdyrǵyshpen kúrese bastaidy. Mundai vaktsinalar balalar úshin óte qolaily.
Qazirgi kezde vaktsina zerthanada pisý protsesinde. Sodan keiin ony tyshqan, qoian jáne egeýquiryq syndy janýarlarda synaqtan ótkizilip, nátijeleri taldanady. Jospar boiynsha synaqtardyń biyl aiaqtalýy kózdelgen.
Mamandardyń aitýynsha, qazir koronavirýsqa qarsy vaktsina Kanadada temeki men júgeriden, al Reseide biokefirden, iaǵni sút ónimderinen alynady. Vaktsinalyq ónim asqazan arqyly ishekke ótedi jáne ishekte antidenelerdiń sińýi nátijesinde organizmde immýndyq júieniń jumysyna bailanysty koronavirýsqa qarsy immýnitet paida bolady.
