2021 jyly Qazaqstanda Kóshi-qon saiasatynyń 2022-2026 jyldarǵa arnalǵan tujyrymdamasy ázirlenedi. Bul týraly QR Eńbek jáne halyqty áleýmettik qorǵaý ministrliginiń keńeitilgen alqa májilisinde vedomstvo basshysy Serik Shápkenov málim etti, dep habarlaidy "Ult aqparat".
Ministr etnikalyq kóshi-qondy yntalandyrý aiasynda 2020 jyly respýblikaǵa 7 myńnan astam otbasy nemese 13 myń etnikalyq qazaq kelgenin, onyń ishinde 396 qandas otbasy qabyldaý óńirlerinde (Shyǵys Qazaqstan, Soltústik Qazaqstan, Aqmola, Pavlodar, Qostanai oblystary) qonystanǵanyn aitty
El ekonomikasyn bilikti sheteldik mamandarmen qamtamasyz etý boiynsha sharalar qabyldanyp jatyr. 2020 jyly bólingen kvota aiasynda jergilikti atqarýshy organdar sheteldik jumys kúshin tartýǵa 17,3 myń ruqsat berdi. Qazaqstandyq qyzmetkerlerdiń múddelerin eskere otyryp, biylǵa kvota respýblikadaǵy jumys kúshiniń sanyna qatysty 0,31 paiyzdy qurady.
Qoldanystaǵy kóshi-qon júiesin jetildirý maqsatynda ótken jyly zańnamaǵa elge keletin qonys aýdarýshylar men etnikalyq repatrianttarǵa qolaily jaǵdailar jasaýdy; sheteldik jumys kúshin tartatyn jumys berýshilerdiń sheteldik bilikti qyzmetkerlerdi qazaqstandyq kadrlarmen almastyrý jónindegi mindettemelerin kózdeitin túzetýler engizildi.
«Kóshi-qon qatynastaryn odan ári damytý aiasynda 2021 jyly úsh negizgi mindet aiqyndaldy. Birinshisi – Qazaqstan Respýblikasy Kóshi-qon saiasatynyń 2022-2026 jyldarǵa arnalǵan jańa tujyrymdamasyn qabyldaý. Ekinshisi – qazaqstandyq qyzmetkerlerdi shetelde jumysqa ornalastyrý jáne quqyqtyq qorǵaý bóliginde tiisti júieni engizý. Úshinshisi – kadrlardaǵy qazaqstandyq qamtýdy qamtamasyz etý keminde 97 paiyz deńgeiinde saqtalady», – dedi Serik Shápkenov.
