Ótken táýlikte respýblika aýmaǵynda pesh aqaýynyń saldarynan 8 adam ystan ýlanyp, 2 adam jylytý qazandyǵynyń jarylýynan túrli jaraqat aldy, dep habarlaidy "Ult aqparat" QR Tótenshe jaǵdailar ministrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, peshti durys paidalanbaýdyń saldarynan taǵy 5 adamǵa ys tigen.
Osylaisha, Almaty qalasyndaǵy Alataý aýdanynyń Shańyraq-1 shaǵynaýdanynda tabiǵi gazben janatyn peshten gaz shyǵýy saldarynan 2016, 2017, 2020 jylǵy úsh bala iis tiip, aýrýhanaǵa jetkizildi. Balalardyń jaǵdaiy ortasha aýyr.
Shyǵys Qazaqstan oblysynda azamattardyń iis tiip ýlanýynyń eki oqiǵasy tirkeldi. Aiagóz aýdanynyń Aiagóz qalasyndaǵy birqabatty turǵyn úidiń páterinde kómirmen janatyn peshtiń aqaýy saldarynan 1952 jylǵy er adam men 1955 jylǵy áiel iis tiip ýlanyp, aýyr halde aýrýhanaǵa jetkizilgen. Oqiǵaǵa pesh murjasynyń tazalanbaýy sebep boldy.
Ekinshi oqiǵa Shemonaiha aýdanynyń Shemonaiha qalasynda boldy. Birqabatty, bespáterli úidegi №5 páterde kómirmen janatyn pesh aqaýynyń saldarynan páter iesi, 1976 jylǵy áiel iis tiip ýlanǵan. Ol aýrýhanaǵa aýyr halde jetkizildi. Oqiǵaǵa pesh murjasynyń (tútindik) tazalanbaýy sebep boldy.
Taǵy bir oqiǵa Aqtóbe qalasynda tirkelgen. «AZF-9» baqsha egý ujymyndaǵy saiajaida kómirmen janatyn pesh aqaýy saldarynan 2007 jáne 2011 jyly dúniege kelgen balalar iis tiip ýlanǵan. Olar aýrýhanaǵa ortasha aýyr halde jetkizildi. Oqiǵa pesh murjasynyń (tútindik) tazalanbaýy sebebinen bolǵan.
Almaty oblysyna qarasty Kerbulaq aýdanynyń Saryózek kentindegi jekemenshik turǵyn úide jylytý qazandyǵy jarylyp, úidegi 2 sharshy metr aýmaqta kómirmen janatyn pesh pen qabyrǵa jarym-jartylai qiraǵan. Kúiik shalyp, jaraqat alǵan úidiń iesi, 1963 jylǵy áiel men 1985 jylǵy er adam aýrýhanaǵa jetkizildi. Aldyn ala nusqa boiynsha, jarylysqa sebep – kómirmen janatyn peshti paidalaný erejeleri buzý. Qazandyqtyń ishinde sý bolmaǵan.
Adamdardyń turǵyn úilerde iis tiip qaza bolýyn boldyrmaý maqsatynda TJM peshti durys tekserip, ony paidalaný erejelerin qatań saqtaýǵa shaqyrady.
