Batys Qazaqstan oblysynda turmystyq zorlyq-zombylyqtyń aldyn alý jáne jolyn kesý baǵytynda keń kólemde «Otbasyndaǵy zorlyq-zombylyqqa jol joq!» sharasy ótkizildi, dep habarlaidy "Ult aqparat".
BQO Politsiia departamentinen málim etkenindei, 13-15 qarasha aralyǵynda ótken sharaǵa túrli uiymdardyń 441 ókili jumyldyryldy.
Turǵyndardyń quqyqtyq saýattylyǵyn arttyrý maqsatynda politsiia qyzmetkerleri ártúrli uiym ókilderimen birlese otyryp, kitapshalar taratty, turmystyq zorlyq-zombylyqtan zardap shekkenderdiń is-qimyl algoritmin túsindirdi. Barlyǵy 1897 material taratylyp, úilerdiń kireberisine senim telefondarynyń nomeri men sait mekenjailary jazylǵan aqparattar ilindi.
Kámeletke tolmaǵandar isteri jónindegi ýchaskelik politsiia inspektorlary jataqhanalarda turyp jatqan áielderge baryp, olardyń quqyqtary men mindetterin túsindirdi.
Oblystyq daǵdarys ortalyǵynda turmystyq zorlyq-zombylyqtan zardap shekken áielderge quqyqtyq keńes berildi.
Negizinen áielder jumys jasaityn memlekettik mekemelerde politsiia qyzmetkerlerimen kezdesýler uiymdastyryldy.
Otbasyndaǵy zorlyq-zombylyqtyń aldyn alý maqsatynda oblys mektepterinde mektep inspektorlary ZOOM tásilimen ata-analar jinalystaryn ótkizdi.
Osyndai jiyndar kolledjderde de ótti. Aitalyq, Oral qalasy politsiia basqarmasy iývenaldyq politsiia bólimshesiniń aǵa inspektory, politsiia maiory Mádina Quspanova A.Imanova atyndaǵy avtojol kolledji 1-2 kýrs stýdentteriniń ata-analarymen otbasynda dástúrli qundylyqtardy ornyqtyrý, quqyqtyq tárbie berý baǵytynda áńgimelesti.
«Meniń osy salada jumys istep kele jatqanyma 16 jylǵa jýyqtady. Jasóspirimder arasynda qylmys pen quqyqbuzýshylyqtyń aldyn alý, otbasynda zorlyq-zombylyq derekterin boldyrmaý jolynda budan bylai da eńbektene beremiz», deidi M.Quspanova.
Sol sekildi BQO politsiia departamenti iývenaldy politsiia tobynyń inspektory, politsiia kapitany Diliara Satarova Batys Qazaqstan indýstrialdy kolledjiniń 1-kýrs stýdentteri ata-analarymen onlain kezdesý ótkizdi.
Shara ótken úsh kún ishinde otbasyndaǵy zorlyq-zombylyqqa bailanysty 29 áiel senim telefonyna qońyraý shaldy. 25 áielge quqyqtyq, 15-ine psihologiialyq kómek kórsetildi. Osy kezeńde 15 aryz-shaǵym tirkelip, otbasynyń shyrqyn buzǵan 5 adamǵa QR Ákimshilik quqyqbuzýshylyq kodeksiniń 73-babyna sáikes hattama toltyryldy. Sondai-aq úsh quqyq buzýshyǵa qatysty ýchaskelik politsiia inspektorlary qorǵaý uiǵarymdaryn engizdi.
Aita keteiik, Batys Qazaqstan oblysynda 277 ýchaskelik politsiia inspektory, olardyń 61 kómekshisi qyzmet etedi. Jyl basynan beri ýchaskelik inspektorlar 2 myńnan astam qylmysty ashty. 22 myńnan astam quqyqbuzýshylyqtyń joly kesilip, azamattardyń 30 myńnan astam ótinishi qaraldy.
