Jyl basynan beri zorlyq-zombylyqqa ushyraǵan 46 901 adam politsiiaǵa júgingen. Bul týraly zorlyq-zombylyqqa qarsy «Ne molchi» qorynyń negizin qalaýshy Dina Tańsári aityp berdi, dep habarlaidy QazAqparat.
«Turmystyq zorlyq-zombylyq bolǵanda, politsiia qyzmeti agressordy jedel tutqyndaýy qajet. Áiel bala-shaǵasymen Daǵdarys ortalyǵyn jaǵalap júrmeýi kerek. Áielderdi quqyqtyq kómekpen qamtamasyz etińizder. Bizdiń qorǵa habarlasatyn áielder de eń aldymen quqyqtyq kómek suraidy. Quqyqtyq saýatsyzdyq kesirinen halyq ózin sotta qorǵai almaidy. QR IIM statistikasyna súiensek, 2020 jyldyń 4 aiynda 46 901 adam politsiiaǵa júgingen. Al sotqa 8 myń is qana jetken. Onyń 4 myńy ymyraǵa kelgen. Iaǵni, zorlyqshylardyń 10 paiyzy ǵana jaýapqa tartyldy», - dedi Dina Tańsári QR Aqparat jáne qoǵamdyq damý ministrligi ótkizgen onlain jinalysta.
Onyń aitýynsha, áielder aryzyn qaitaryp alýǵa májbúr, óitkeni agressor 3 saǵattyq profilaktikalyq áńgimeden soń úiine qaitarylady jáne áieldiń ómirine taǵy qaýip tónedi.
«Daǵdarys ortalyqtary árine kerek, biraq onyń qazirgi jumysyna kóńilim tolmaidy. Áielder kómek úshin ortalyqqa keledi de, qatań tártipke, kazarmalyq ómirge tap bolady. Kóp áielder Daǵdarys ortalyǵyn áielder koloniiasy nemese rejimdik nysan dep ataidy. Biraq olardyń basqa baratyn jeri joq, óitkeni zań agressordy qýyp shyǵýǵa múmkindik bermeidi. Nátijesinde jábir kórsetýshi ortaq baspanada qalyp, áielder men balalar jasyrynyp júrýge májbúr bolady. Biz kimdi jazalap júrmiz? Eger memleket kómekteskisi kelse, teńdei quqyqpen qamtamasyz etsin. Al munda jábirlenýshi men balalar jazalanyp júrgendei. Osy otyrysqa qatysýshylardan surap kóreiin, óz úiińiz, óz tósegińiz, óz ádetterińiz bola tura, Daǵdarys ortalyǵyna baryp, 10 adammen bir bólmede turýǵa, kún tártibimen oianýǵa, daiyndap bergen tamaqty ǵana jeýge keliser me edińizder? Nege jábir kórsetýshiniń úide qalýyna ruqsat beriledi? Osyndai jaǵdaiǵa kelispegendikten áielder kúieýine qaita oralýǵa májbúr», - dedi qoǵam belsendisi.
Sonymen birge, spiker qorǵanys buiryǵyn buzǵandardy qylmystyq jaýapqa tartýdy usyndy.
«Qazir áieline jábir kórsetýshi politsiia bólimine barady da, profilaktikalyq jumys júrgizildi degen bir japyraq qaǵazǵa qol qoiady. Munyń barlyǵy – shartty nárseler. Eshkim onymen túsindirý jumysyn júrgizbeidi. Mundai qujatty amerikalyqtar buzbaýǵa tyrysady, óitkeni bul buiryqty buzsa, 5 jylǵa deiin abaqtyǵa qamalatynyn biledi. Al bizdegi jábir kórsetýshiler úshin bul – jai ǵana qaǵaz. Sońǵy 4 aida politsiia 30 myńnan astam qorǵanys buiryǵyn berdik deidi. Bul ne beredi? Kimdi toqtatady? Sol úshin zorlyqpen kúres jáne qurbandarǵa kómek jumystaryn qadaǵalaityn úilestirý ortalyǵy kerek», - dedi Dina Tańsári.
