Otbasynda janjal jasaǵandar kóbine keshirim surap qutylady. Bul týraly búgin Parlament Májilisiniń jalpy otyrysynda QR Bas prokýrordyń orynbasary Marat Ahmetjanov málim etti, dep habarlaidy QazAqparat.
«Zań jobasynda quqyq buzýshylarǵa jaýapkershilik sharalaryn qatańdatý usynylǵan. Osylaisha, otbasy múshelerine balaǵat sózder aitqany, til tigizgeni jáne olardyń qadir-qasietin tómendetkeni úshin ákimshilik qamaýdy 5-ten 10 táýlikke deiin, al qaitalap buzǵan jaǵdaida 15 táýlikke deiin ulǵaitý boiynsha túzetýler jumys tobynda qaralyp jatyr. Osy túzetý boiynsha Bas prokýratýra ókiliniń pikirin bilgim keledi», - dedi depýtat Nurjan Áshimbetov.
Óz kezeginde Marat Ahmetjanov jaýapkershilik sharalaryn kúsheitýdi qoldaitynyn jetkizdi.
«Degenmen, tiisti qataitý sharalary ońtaily nátijesin bermei jatyr. Byltyr tiisti zań qabyldanyp, qosymsha baptar engizilgen edi. Naqty turmystyq zorlyq-zombylyq jasaǵany úshin qamaýǵa alý kórsetilgen. Biraq ta sol normalardyń ózi qoldanylmai keledi. Zań boiynsha kóbeitkenimen, qoldanysta bolmaǵan soń onyń nátijesi bolmaidy. 5-ten 15 táýlikke deiin kóbeitemiz de, jumys jasaldy dep otyramyz. Búginde osyny uiymdastyrý jaǵynan kemshilikter bar, ony moiyndaimyz», - dedi Bas prokýrordyń orynbasary.
Osy oraida ol otbasynda janjal jasaǵandar tek bir táýlikke qamaýǵa alynyp, bosatylyp jatqanyn aitty.
«Byltyr jeltoqsanda úsh táýlikten bes táýlikke deiin uzarttyq. Alaida osy bap boiynsha sol 5 táýlikti alyp jatqan adam joq, barlyǵy bir táýlikpen shektelýde. Nege olai bolyp jatyr? Óitkeni bir táýlik boiynsha buzaqy adamdy alyp keledi de, ishki ister organdary 24 saǵat ustaidy. Sotqa bergen kezde jábirlenýshiler, otbasy músheleri kelip, keshirim suraidy da, bir táýlikpen toqtatylady», - dep túsindirdi Bas prokýrordyń orynbasary.
Bul turǵyda ol keshirim suraý tek bir ret bolýyn qoldaitynyn, ekinshi ret qaitalansa, qamaýǵa alý tártibi iske asyrylýy kerektigin aitty.
«Ákimshilik kodekste uryp-soqqany úshin 15 táýlikke deiin, al jeńil jaraqat jasaǵany úshin 20 táýlikke qamaýǵa alý eskerilgen. Ókinishke qarai, bul institýttar jumys istemei tur», - dedi Marat Ahmetjanov.
